Ongeleka moNamibia oya dengwa pomutima kombuto yoCovid-19 molwomwaalu wovanhu ou wa ngambekwa okukala mongeleka.
Meenghundafana a ninga naKundana omupopiliko wongeleka yoEvangelical Lutheran Church moNamibia Thomas Uushona okwa hokolola ta ti ove li meshongo lakula lopashimaliwa pefimbo eli lomukifi woCovid-19 tau dana onghandangala moshilongo.
Uushona okwa ti ongeleki yaElcin ihai mono vali oshimaliwa sha wana okudja omudo wa dja ko eshi ombuto ei ya tukuka moshilongo.
“Paife omwaalu wovanhu owa ngambekwa wa ya pedu neenghono, onghee eshi oshi li sha kuma ongeleki yetu shaashi ovanhu ovashona ava tave uya kongeleka. Paife ovanhu ihava umbu vali ongalo ngaashi sha kala shito,” Uushona ta ti.
Okwa yelifa ta ti okudja omudo wa dja ko ondjabi yovanailonga inai wedelwa tuu nande, yee ta ti eengeleka dimwe ihadi longo vali oshimaliwa sha wana okufuta ovanailonga vavo ngaashi ovadiyakoni, noohamushanga.
Onghee ondjabi yovanailonga nayo oi li ya kumwa koupyakadi ou wombuto yoCovid-19 ei tai dana onghandangala mounyuni aushe.
“Ohandi indile ovakwaneongalo opo va kale tava yandje oiyandjwa yavo, nokufuta omido opo ashike ongeleki yetu ikwashipaleke kutya otai yandje omayakulo nopefimbo eli lidjuu lombuto tai hepeke ovanhu,” Uushona ta ti.
Uushona okwa popya ta ti ovakwaneongalo vamwe ihava futu vali nomido davo nokuli shaashi vati ova kanifa oilonga yavo, onghee naasho oshi li eshongo lakula.
“Eshi omwaalu wa ngambekwa, ovakwanehongalo vamwe ova shuna monima, eitavelo lavo inali kola vali shaashi ihava i vali kongeleka,” Uushona ta ti.
Uushona okwa ti ovanhu nava kale tava ningi omalongelokalunga momaumbo avo, vo tava kala ashike tava twala oiyandjwa yavo koshinyanga shaashi ou oo omukalo muwa wokuongela oshimaliwa shongeleki yetu, opo tu kaleke po omaongalo etu taa i komesho.
Okwa denga omufindo ta ti eengeleka adishe nadi kwashipaleka kutya omwaalu wovakwaneongalo owa ngambekwa ngaashi naanaa sha tulwa po komupresidende woshilongo.
Natu liufeni komilandu doCovi-19 edi da tulwa po shaashi omufiki ou owa nyika oshiponga neenghono,” Ushona ta ti.