Selma Ikelas
ǀAEǁGAMS – Gaxuse !âuhe hâ !ā!khōmais di daob!norasasib ǁhūn di ǁnâu!gâ!khaib ge mîhe rasa !oa !goaxa ǁkhâb !nâ nî sîsentsoatsoa. Nē ǁnâu!gâ!khaib di ǁkhawa ǀhui-amhes ge ǁaupexa 80 000 khao hâ hâ daob!norasasib māǂoa hâ mātarehe nîse ī ǁhōn !nâ kai huib ase nî ī. Nē ǁnâu!gâ!khaib ge Sam Nujoma !Ganni tsî Bismarck Daob hâkha ǁhôas !nâ mâ tsî !âubasenhe rase tsî ǀaweǁguigu !oa 2 ǂKhoesaob 2018 dis ai nî ǀhui-amhe !oabade mās !aroma. “Nēs ge sida ǀhûǁarebe !ereamsa, ǂhanu-aisiba khoena hā-ūba tsî ǁawoǁawosa îb ǂhanu-aisib khoena !oa nî ǀkhība tā !onkhao kaihe. ǁNāb ge ǀgaub sida !âǀhuru-aoda ase!ûǂamde dīs !âb tsî !āǁî ǂgaeǂguis !âb ase ge dītsâ tsî īǁkhāsiba a ǁgausa,” tib ge Permanende Sekretareb, ǂHanu-aib Ministeris dib Issaskar Ndjozeba ge mî. Ndjozeb ge nēsa ǁnāpa ge hâ i ǁnâuguxoaǁguib di xoa!gaos hîa ǀAeǁgams !Ā!khōmais tsî ministeris hâra ǁaegu ge daob!norasasib ǁnâu!gâ!khaib ǂnamipe hâ is tawa nēsa ge mî. Nē ǁnâuguxoaǁguib !nâ i a mîsasa !oas ge ǀAeǁgams !Ā!khōmaisa, !hūs nē ǁnâu!gâ!khaib mâ-aisa mario!nâse ǀorodomma disi kurigu ǁaeba ge mā tsî nēs xōǀkhā ǀgam ǁnau!gâ!nâ !nā-omra tsîna ge om, daob ǁgaraga !ûǂams !ûǂamdi ǀkha ra ǁnâu!gâhe khoen !aroma. “ǀHûhâsib ge nî ǂan maxasrati ǁnâu!gâ!khaib hîa Luderits !Ganni !nâ mâb, !aruǀî daob ǁhōn ǀkha sîsenxa tidesa, xawen nēn hoana ǁnā ǀasa !khaiba xu nî hâsa. Nē ǀasa ǁnâu!gâ!khaib ge ǀgam ǀmaxastratra tsî ǀoasa !nans ǁkhaubas dis tsîna nî ūhâsa hoa daob !norasasib ǁhōn !aroma,” tis ge Permanende Sekretares, Rolanda Van Wyks, Beros ǂHanugu dis tawa hâsa ge mî. Noxopa nē !khaib tawa nî hân ge mātarehe ra !khaib, ǂkhanin ǀkha sîsens !âb, berodi ǁkhara-aon, ǂhanusi !oabadi !nans tsî ǀgora!gâ-aon !aroma. ǀAeǁgams !ā!khōmais di Sîsenǂuira Mâisab Robert Kahimiseb, ge ge mî ǁîn di ǀawemā!nans di ǂnûs hîa ge Taraǁkhumuǁkhâb 2014ǁî kurib dis ai ūhe hâ is tawan ge ǁîna mîǁguiba a ūsa, ǁnâuguxoaǁguib ǀkhan Ministeris ǂhAnugu dis ǀkha nî ūhâsa, ǁawoǁawos ǂâuǀoa hâ sîsengu !oabade mās !aroma.