Victoria Kaapanda
Okuyambidhidha omandiki ga yooloka ngaashi elongo, uuhaku, omaudhano uuna ga taalela omaupyakadhi, otaku tsikile onga oshinakugwanithwa shehangano lyoDebmarine.
Omunashipundi gokakomitiye goka komitiye taka ungaunga nomayambindhidho ngoka mehangano lyo Debmarine, Stella Auala-Ipinge, okwapopi ngaaka esiku yali yapatulula tango uundjugo wosikola ndjoka.
Ta ti, ehangano lyawo olya yambindhindha osikola Elamba combined momundhingoloko Otsandi noshimaliwa N$500 000 opo uundhugo mboka wutungwe.
“Sho kwali twa mono omayindilo okuza kosikola ndjika omimvo ndatu dha piti, okwali twa zimine omolwa onkalo twa kwashilipaleke, osikola ndjika yali yaatalela,” ta fatulula ngaaka.
Ta gwedhapo ta ti, shoka inaye shi ninga ashike omolwa ya hala okuufula, ihe oyeshiningi opo aanona yosikola ya kale taya longitha ehala lyili nawa oshowo okukalekapo uuyogoki.
Iipinge okwakumagidha aanasikola mboka opo ya kwate nawa uundjugo wawo, opo wu vule okulongithwe natango monakuyiwa kwaamboka taya zi konima yawo.
Uundjugo mboka owuna ombinga yimwe yaakandhona yina omala gane guundjugo, omanga ombinga yaamati yina omala gaali oshowo uupoto wokutalalaleka wamati wuli uyali.
Ehangano lyoDebmarine okwali lya ulike lya nyanyukwa nkene okandjugo hoka katungwa, shoka tashi ulike kutya oye uvite kutya oshimaliwa oshahepuluka.
Omupevikuluntu gwelongo moshitopolwa shaMusati Sophia Ashipala ngoka ali a pandula ehangano ndyoka, okwali natango aakumagidha aalongwa yakalekepo okandjugo kawo keli monkalo ngaashi katungwapo.
“Kehe shoka tashi kayonuka, nashi longululwe methimbo efupi, okuyanda shi yonukilile,” ta kumagidha ngaaka.
Ashipala okwali a ulike olupandu nomokupupya kwe, ta ti, ehangano ndyoka nali tsikile natango okulonga iilonga yatya ngaaka, nonando hasho oshikando shotango tali yambindhindha moshitopolwa shaMusati.
Omukuluntusikola posikola mpoka Salomo Shipopyeni okwati, oya kala yataalela uupyakandhi wuundjugo ukulu, ihe nena otaya pandula taya longitha uundjugo tau undulwa nomeya, onkalo ndyoka ya pumbiwa wo mokati kaalongwa.
Omulongwa mondondo 9 posilkola opo tuu mpoka, Shiwilo Titus okwati, oyuuvite nawa sho ya mono uundjugo uupe, oyendji yo muyo ka kwali yena ethano nkene uundjugo woshinanena, ihe nena otaye wulongitha.
“Uundjugo mboka otauke tukwathela wo okukeelela omikithi dha yooloka hadhi zi lile pomahala gakaka, oshoka muundjugo moka omuna uutemba womeya go kwiikosha koonyala ethimbo alihe wa mana okulongitha okandjugo,” ta ti ngaaka.
Otandi pandula ehangano lyoDebmarine. Nali tsikile okuyambindhindha oosikola ndhimwe dhataalela onkalo kwali yafa ndjoka ya zi muyo.
– vkaapanda@nepc.com.na