Taimi Haihambo 

Teeleleni Mumbangala, a shivika nawa mowela nedina Tate Buti, okwa etela ovakwashiwana vaNamibia oalubuma ipe, i va mwenyeke muDesemba. 

Oalbuma yeengalo daTate Buti yedina ombululu, oi na eengalo o-23, nongalo yaxuuninwa koshivalo oi li koshi yedina “ Olungus”.

Umwe womovasapoti vaTate Buti, Victor Josef oo a pwilikina oalubuma okwa ti omateleka aTate Buti otaa mwenyeke, notaa kumu komwenyo. 

“Ondi hole po limwe nokuli vati omufenu waNangula ngaha. Eshi ashike nde li dana lwotete, nokusaka osho nda sake mo,” ta ti. 

Tate Buti okwa ti eengalo daye otadi yandje ohole, exungomwenyo notadi mwenyeke. 

Ashike nande ongaho okwa holola enyeme laye kovakwashiwana ava tava kufa eengalo daye shihe li koshi yeufo laye, vo tave di danifa mou-USB. 

“Oka-CD kamwe oke na ashike N$ 200. Nena ngeenge omwa tape eengalo dange, nye itamu lande  ohandi ka lya peni?” ta pula. 

Ota ti ohashi pula efimbo osho yo oshimaliwa opo a dule okweeta po eengalo daye. 

“Ohandi pula ovakengeleledi va xulife po eendunge doukengeleledi ngeenge tashi ya peengalo. Kwafei nge mu sapote momukalo wokulanda  ou-CD,” ta ti.