WINDHOEK- Uuministeli wetanga lyegameno otawu ulike oshigwana omunwe kutya kehe ngoka ta ka monika ta piyaganeke ombili yoshilongo noshowo ta ningile omupresidente omambandameko oku mu dhipaga ote ke wu toola mo.
Ndhika odha li dha tumbulwa kwaangoka e li omutse gwetanga lyegameno gwopokathimbo ye okuli omutse gwetanga lyomewangandjo Aiur Vice Marshal Martin Kambulu Pinehas sho a li ta popitha aatoolinkundana moshilandopangelo ongula yOmaandaha.
Pinehas okwa hokolola kutya aagundjuka mboka taya tumu omawi ga kutha noongodhi taya popi kutya otaya kutha ko omupresidente Geingob koshipundi otaya londodhwa ye shi hulithe po meendelelo ngaashi naanaa tashi vulika oshoka aakwiita yetango lyegameno itaye ke shi pitika nande.
“Ondi li mpaka tandi indile kehe ngoka e na ehalo nenge a tameka okweeta omatopokathano moshigwana e shi kaleke meendelelo. Nondi li mpaka tandi indile aakwashigwana Aanamibila naaholimbili ya ikaleke kokule naayehe mboka taya hwahwameke omalugodhi ee taya igameke okusimaneka noshowo okulandula oompango dhoshilongo,” oshi Pinehas a dhenge omuthindo ngaaka.
Ashike okwa shilipaleke oshigwana kutya nonande otashi vulika ya ka kale ye na iikonga mbyoka tayi patulula noshowo tayi keelele iimbuluma ashike otaya kambadhala nkene taya vulu opo pwaakane nande omwenyo gumwe miikonga mbyoka.
Okwa hokolola kutya ota kumagidha woo aaleli noshowo aanapolitika ya kumagidhe aaholimbili yawo opo ya kale ya ihumbata pamukalo omwaanawa noshowo gwombili.
“Etanga lyegameno nkene lya kala olya kala hali gamene ekotampango lyoshilongo onkene nongashingeyi osha pumbiwa okukala tali gamene ekotampango ndyoka,” osho ngoka eli omutse gwetanga gwopakathimbo a hokolola komeho gaatoolinkundana.
Okwa ti otaya tsikile nokugamena ombili yoshilongo ngaashi naanaa sha kala omukalo ndjigilile.