Omukainhu weedula 36 okwe likufa omwenyo eshi vati a lundilwa kutya okwa teya ongodi yopeke yaxekulu.
Oshiningwanima eshi osha ningwa kolukanda Orutjandja li li mOpuwo.
Nakufya okwa tongololwa oye Sonia Naihalwa omukwashiwana waAngola.
Omupedu Commissioner wopolifi moshitukulwa shaKunene Paavo Iiyambo okwa hokolola ta ti Naihalwa okwa pula xekulu opo a tume ko etumwalaka kongodi yaye.
Vati eshi a shuna ko ongodi kuxekulo oya kala ina i hala vali okulonga.
Opolifi oya ti okudja opo xekulu okwa kala ta tanguna ta ti Naihalwa oye a teya ongodi yaye.
Naihalwa naye vati okwa tameka okutanguna naxekulu te mu lombwele kutya haye a teya ongodi ashike xekulu okwa kala ta twikile te mu findile kongodi kutya oye ashike a teya ongodi yaye shaashi vati oya xuuninwa momake aye.
Opolifi oya hokolola tai ti okudja opo Naihalwa okwa ya monduda yaye ndele te li patele mo.
Umwe womumwainakadona okwa kala te mu ufana a patule po ponduda ashike ita nyamukula.
Onghee ovaneumbo ova ninga onghendabala opo vateye po omuvelo wonduda shaashi okwa li va limbililwa.
Eshi vati omuvelo wa teywa po Naihalwa okwa hangika a fya nale, eli meemhango.
Ka pena omunhu a kwatwa po mekwatafano lefyo e li onghee omakonakono opolifi otaa twikile.
– fhmalwa@nepc.com.na