Charles Ndeumane

Okomisi yomahogololo yaNamibia (ECN) oya kwashilipaleke omahogololo ge li paushili nopauyuuki pethimbo lyepatululo lyoshigongiilonga shomadheulo gaanambelewa yokomisi mboka taya ka longa momahogololo.

Eegululo lyoshigongiilonga shoka olya ningwa komukuluntu gwokomisi yomahogololo Peter Shaama.

Aanambelewa otaya dheulwa nkene yena oku ungaunga nomauyelele gomahogololo, nkene yena oku kwatathana naahogololi, nkene iizemo yomahogololo yina oku kuthwa kiitopolwa noosenda dha yooloka opo yi falwe kombelew yopashigwana, oshowo nkene yena oku ungaunga nomashongo ngoka ta ga vulu oku holoka pethimbo lyomahogololo.

“Pethimbo ndika ta tu ilongekidhile omahogololo osha simana oku dheula aanambelewa yetu yomauyelele nuungomba, aakwashilipaleki, oshowo aayaluli mboka ta ya ka kwatela komeho omahogololo niilongitho mbyoka ya pumbiwa, ontseyo, nosho tuu. 

Iinakugwanithwa yeni ina yi simana owala pethimbo lyomahogololo ashike oya simana wo moku hwahwameka einekelo lyoshigwana momilandu dhetu nduudemokoli,” Shaama ta ti.

Shaama okwa ti omahogololo ogo ethimbo aakwashigwana yaNamibia haye ya pamwe opo ya longithe uuthemba wawo mboka wa simana noonkondo, nokwa dhenge omuthindo kutya omahogololo ogo ekota lyuudemokoli woshilongo.

“Omahogololo kehe oha ga gandja ompito kaantu yetu opo ya ulike shoka ya hala monakuyiwa yawo oku pitila maaleli mboka ya hogolola. 

Onga etanga mwa inekelelwa oshinakugwanithwa shoku shika shopashigwana, omu na oshinakugwanithwa oshinene moshikumungu shika shuudemokoli. 

One aatonateli yuuyuuki, oshili, oshowo uuyelele womahogololo getu onkene omadheulo genii ta ga vulu oku kala inaa ga ya komeho,” a gwedha po. Okomisi yomahogololo oya tokola oku gandja ompito kAanamibia ayehe opo ya hogolole aaleli yawo kehe mpoka ta ya iyatha pethimbo lyomahogololo noya pititha uuyelele kombinga yomahala gokuhogololela gAanamibia mboka mboka ye li kiilongo yilwe.

-mrndeumaneraycharles@gmail.com