Rudolf Gaiseb

Omu vana kutamununa ngendeseso zokugwana mahundiro govakandindate valitjangese, nokupulisira nombunga politika dikaze nye monokampaign yiyo nye zina kutanta ezi ngendeseso zokutulisapo vakandindate melikwamo lyangesi. 

Ngendeseso nazivatera mokuruganesa yimbapira yoyinzi morwa kuturamo mahundiro omu hena tuna hara kutunda monomukweyo dakarapo kovakandindate ndi kovahorowoli. ‘’ Omu nye tuna hara kuyirugana, mokwedi kwaMangundu 2024 momahoroworo, ose kuyagwanekera nyamwetu pouruwo yoyidigu – ngesi siruwo sokuruganesa unkurungu ntani magano gomawa aga tuna kara nago naga ninkisa asi tuze mongendeseso zetu zopaudemokoli. 

Apa nye tuna kugava noforoma edi kupitira ponongodi, nayininkisa asi vakandindate momaruha nagenye, nomukunda doponze nendi domodoropa, kuvhura nye valitjangese. Eyi tayipenye mukumo udemokoli wetu omu tuna hara asi vantu wokulisiga siga valihameseremo. 

‘’ Eyi yokuruganesa konongodi hawe nayikara asi kapi tomana siruwo unene mokutumbura eyi ono hara. Eyi kuna kuretesapo hena mutaro nye gomuwa unene ntani vantu nawo vahepa kuyihuguvara ntani ngendeseso zomahoroworo vahepa kuzimona asi zina magnurukire nkenye ogu mokuzitarurura,’’ yimo ana kutanta komisare gumwe nage gomahoroworo Gerson Tjihenuna. 

Age kakahuyungire kahuyungire pedeuro lyowo vana kukaruganesa elikwamo eli ponongodi mokupitira moECN moutano kaupwireko. Edeuro eli kalikere lyokudeura ntani kutwaramo ava vana kara asi tavakayiriugana rambangako novakarelipo wono,mbunga politika nawo vahepa kukara noudivi wangesi. 

Age kahuguvaresere vantu asi hawe kuna kara ekeverero lyouhunga poyininbke yangesi ose kuvhura nye kukeverera nombudi detu dongendeseso zomahoroworo. 

Age katanterere vakarelipo wonombunga politika asi eyi yina kara mulyo unene mongendeseso zomahoroworo getu moNamibia. ‘’ Eyi kuna kara asi kapi yina kara tupu yokuhuyunga. Eyi kuna kara yomutaro ntani kuna kuza komeho yina kara asi yomapuliro getu omu natugwanekera novantu vetu muhoko gwetu nayina nokomeho oko. 

Ose kuna kuyimona asi nkenye mbunga politika ntani novakandindate vawo kuna kara nehuguvaro ntani nokuvapa siruwo sokulifana morwa mongendeseso zoudemokoli tuna kara ngesi. 

Posiruwo sooso muhuyungilipo ECN Mulauli Siluka kayitente asi ngendeseso kuna kara zimwe ezi vana kuruganesa mokutjangesa vahorowoli –omu vana kumona asi tayikareru mokukagendesa nokukatjangesa vahorowoli nokukagatara madina gawo asi gana wapa ndi ngapi, ntani mokukagwana nye yitundwamo, omu nombunga politika nadikagava madina govakandindate vawo, ndi nombunga politika dene dina kukalitjangesa ndi nombunga dopaumwene. 

Age katente asi kupitira monongodi yimo natugwana madina govakandindate, unene aga vanatulisapo mwaSiwogedi mvhura zeezi, aga nye gana kutunda kwava vana pulisire nombunga politika dawo. ‘’ ECN ngesi kuna kara nositafura esi vana kugava mauzera kovakarelipo wonombunga politika nsene kapi vana kudiva nawa nawa asi ngapi vana kuruganesa noforoma odo doupresidente ntani dombongarero zanavenye vaziture mongedeseso. 

Kuhamena edeuro lyovahameni ntani vakarelipo vawo wonombunga politika, Siluka katente asi ‘’ edeuro kaligenderepo nawa.