Nonande ongundu yopapolitika yoNamibia Economic Freedom Fighters (NEFF) oya sindana po oshipotha shokundhidhilikwa kokomisi yomahogololo (ECN) ongangundu yopapolitika mompangu yopombanda, momuthitu inamu ziwa natango. Okomisi yomahogololo oya ti opo manga tayi talulula etokolo lyompangu, shoka omuleli gwo-NEFF ta ti ndhoka oonkambadhala dhokudhika ongundu.
Omuleli gwongundu yo-NEFF Epafras Mukwiilongo okwa ti okomisi yomahogololo otayi kambadhala okudhika o-NEFF oshoka sigo oompaka ongundu ndjoka inayi ninga nande iigongi yomahwahwameko. Shika osha landula sho ongundu yo-NEFF ya sindana po oshipotha moka ya li ya fala okomisi yomahogololo moNamibia kompangu yopombanda moshilongo molwaashika ye yi kutha momusholondondo gwoongundu dhopapolitika pethimbo oshilongo sha taalela omahogolo gopaupresidente niilyo yopaliamende, ashike okomisi yomahogololo oya pititha omukanda moka ya ti itayi taamba ko etokolo lyompangu ashike opo manga tayi talulula etokolo ndyoka.
“ECN ota kambadhala okuya o-NEFF moshipala. Oongundu adhihe dhopapolitika odha tameka nale niigongi yomahwahwameko ashike tse sigo onena inatu ninga nande oshimwe. Ompangu yopombanda moshilongo oya tokola, ashike natango ECN ota kambadhala okukondjitha etokolo ndyoka, oshoka elalakano okudhika o-NEFF shaashi oku na ashike omasiku omashona okuya momahogololo,” Mukwiilongo ta ti.
Mukwiilongo okwa ti Aanamibia oyendji otaya kanitha einekelo mokomisi yomahogololo molwomaihumbato gayo ga tya ngaaka, tayi kondjitha ongundu yopolitika. Okwa tsikile ta ti ke shi kutya ECN ota kwata ethimbo li thike peni okutalulula etokolo lyompangu, ashike okwa ti aayambidhidhi yongundu yo-NEFF naya tegelele ashike etoko lya-ECN.
Omunambelewa gwomakwatathano mokomisi yomahogololo De Wet Siluka okwa ti okomisi yomahogololo ponkatu mpaka itayi popi kutya uunake tayi ka mana okutalulula etokolo lyompangu yopombanda. “Shoka twa popile momukanda osho owala twa ikolelela kusho natango, itatu gwedha ko sha. Katu shiwo kutya otatu mana uunake,” osho Silika a popi ngaaka.