RUNDUS – Paulus Sifireb, ǁHûidi !Nans Namibiab dis (ECN) di Kavangob Aiǂoas ǀkharisi mâisab ǁhûidi !aromab, ge ǀawa!namn, ǂgiǂgo!nandi ǂnûǁkhaeba-aon tsî ECNs sîsenaon tsîna ra ǂgan, !goaxa ǁhûidi 2025 di ǀKharisi ǀAwemā!nandi tsî !Ā!nāsi ǂGaeǂguidi di di, 26 ǀHōǂgaeb dis ai nî hâse idi !nân ǁhûi-aona !gôasib ǀkha nî sîsenū !khaisa. ǁÎb ge mîs ge, ǁhûi-aon hîa kairan, ǀgamǀkhā tarekhoedi tsî sorosi !nubusina ūhân nî !gôasib ǀkha tsî khoexa!nâse sîsenūhesa. “Nē khoen ge ǂgurose !gôasib ǀkha nî huihe. 

Mâ ǁhûi-ao-i hoa-i ge !gôasiba anu hâ, ǁîn hâ !aromas ais ge nēpa da hâsa,” tib ge mîse. ECNs ge ǂoa ge wekheb di Wunstaxtsēs ai ǀgui tsēsa ge !khōǂgā hâ i ǁkhāǁkhākhâisa ǀawa!namn tsî ǂgiǂgo!nandi ǂnûǁkhaeba-aon !aroma Rundus !nâ ge ūhâ i, !goaxa ǁhûide ra !gû!oase. ǁHûis nî ǂnāǁnâs ai!âs ge ECNsa ǀawa!namn, ǂgiǂgo!nandi ǂnûǁkhaeba-aon tsî ǁhûidi !gûǁnâs tsî !gôas ǀkha nî dīxūxa mâisana ǁîn di !ereamxasigu tsî mâtis ǁhûis !gûǀgauba nî hâs ǂnamipe gere ǁkhāǁkhākhâi. 

Sifireb noxopa gere mîs ge, ǁhûidi toro!khams di tamasa, xawe a demokratise ǂhanu mâ !hūǁî-i hoa-i ǁî-i ǁhûidomma nî ǀō kaisa. ǁHûidi !nâ ǂgiǂgodi !aroma !â khoenab ge Sifireba ǁîn ūhâ !ereamxasigu tsî mâ !âsan ra ǀhurusa hōhō!nâ tsî ge mîba, ǁîn ǂgiǂgo!nandi âna ǂnûǁkhaeba, !nandi ǁgaumâi hâ khoen ǁhûibahen nîse ina ǂnûǁkhaeba, !nandi tamas ka i o !gaeǁarede ra ǂnûǁkhaebasa tsî nî kō!hara !gûǁnâǀgauba tsî ǁawoǁawo ǂhau!nâsen xūna nî dīhe !khaisa. 

“Sats ge sa tama !âb !nâ !hoaǂgâ tide, xawets ge !nurima tsî nî xoamâi. Hana-i sats tsî ǁnā ǁhûi!nâ !âb mûǂamao-i ǁaegu ǁnâusāgu-e nî hâs kara, tamas ka i ots nî ǂhâǂhâsa !nae!khai-e nî ǂanǂan ǂgaos kara, o hâ ra !Nae!khain ǂKhaniba sîsenū re.” 

ǀAwa!namn !oab ge Sifireba a mîs ge “Sadu !ereams ge ǂkhîba ǁawoǁawo, ǁkhauba ǁhûis ǂkhanina, tsî ǁawoǁawos hoa !âǀhuru-aon disa, ǀguis khami ī !ao-i tamas ka i o ai!hūba ǁam kai-i ose. ǁHûi!âsa ra mûǂam mâisa-i ge ǁnāpa !khōdanasa ūhâ tsî ra ǁawoǁawo ǁhûis !gâise ǁguisa ǂhanugu !oagu ra !gûsa. 

ǂGiǂgo!nandi ǂnûǁkhaeba-aon ge ra !hara tsî ǀawa!namna ǂhanuse tsî !norasases ǁhûisa nî !gûsa kō!gâ. Mâ mâisa-i hoa-i ǁî-i di !âsa !gôasib tsî !gâi tanisenǀgaub !nâ nî hā-ūs kara, os ge ǁhûisa ǂâuǀoasasib !nâ tsî ǂkhîb ǀkha ra !gûǁnâ