Okaana kofikola oko ka dipawa kengungo lovanhu keengulasha dOsoondaxa moWalvis Bay shaashi vati ka nyeka omunhu ongodi ola shivifwa.
Okamatyona aka vati oko Iikaha Andreas Shikongo (17) kwa li e li mondodo 10 pofikola Tutaleni High School.
Otaku hokololwa Shikongo a fya eshi a dengwa neenghono kengungo lovakwashiwna Osoondaxa efimbo lwopotundi 03h30, molukanda laKuisebmund.
Omukonakoni woimbuluma wopolifi moshitukulwa Erongo omupedu Commissione Erastus Iikuyu okwa hokolola ta ti omunafikola ou okwa li e li nookaume pomunghulo wopate, eshi a vakula ko ongodi yopeke komunhu a li e li motuwa tai ende kashona, ndele ta faduka po a yuka mokati keebashu.
Engungo lovanhu ovo ve mu mona ole mu ponokela noku mu denga fiyo tave mu ehameke neenghono.
Okwa twalwa koshipangelo shaWalvis Bay nokonima okwa ka tuminwa koshipangelo shakula shaWindheok shaashi okwa li e li monghalo itai nuwa omeva.
Opolifi oya ti Shikongo okwa xulifa Omaandaxa efimbo lomutenya moshipangelo shaWindheok sha etwa eshi a mona oshiponga neenghono.
Fiyo opapa kape na omufekelwa a kwatwa po mekwatafano lefyo lomunafikola ou shaashi kape na ouyelele kutya okwa dengwa kulyelye.
Ovakwapata vaye ova shivifilwa efyo laye nomakonakono opolifi otaa twikile.
Opolisi otai ndile moshiwana shomomudingonoko waWalvis Bay kwaau e na ouyelele kombinga yongudu yovanhu ovo va denga Shikongo opo a lopote kopolisi keshe i li popepi ile va kwatafane nomupedu Commissioner Erastus Iikuyu 0812464757.
Opolisi oya ti oya pumbwa ouyelele ou meendelelo.
– fhamalwa@nepc.com.na