Auleria Wakudumo 

Elelo lodoolopa yaNdangwa ola fatulula nokuyeleka omapopyo okutya ola yandja oplota yongushu yoshimaliwa shi fike poN$300 000 kumayola wodoolopa mukulu Paavo Amwele. 

Omupopiliko wodoolopa, Petrina Shitalangaho okwa holola kutya onhele oyo tai popiwa oya kala nale i li kedina lamayola mukulu. 

Okwa ti Amwele okwa mona oumwene wayo nale mo2004 omanga ina ninga mayola wodoolopa yaNdangwa. 

Onhele oyo tai popiwa paife oya ninga onhele yomangeshefelo hai ifanwa oHuhu City,” Shitalangaho ta holola ngaho. 

Shitalangaho okwa fatulula kutya momudo 2016, elelo lodoolopa yaNdangwa ola ninga etokolo opo li kwatakanife eepate odo da ya fiyo okomatala oNdjondjo mOndangwa. 

Etokolo eli ola eta elunduluko meengeshefa nomeenhele dovanhu ovo va li va kundafanwa navo kelelo lodoolopa yaNdangwa, mwa kwatelwa onhele yomangeshefelo yamayola mukulu. 

“Opate ipe oyo ya eta elunduluko eli, oya kwatakanifa omatala ape osho yo omaloobota Oluno. Opate ikwao oyo ya eta elunduluko oye yi ya topola oHuhu City, onhele yamayola mukulu osho yo Erf 1235,” Shitalangaho ta ti. 

Omupopiliko okwa ti elunduluko eli alishe ola li la ningwa mekwatafano noovene veenhele mwa kwatelwa mayola mukulu. 

Eudafano ola li kutya ove na okushangifa natango eenhele davo kelelo molwelunduluko olo la ningwa po. Okwa weda po yo kutya omalunduluko aa okwa pula yo elelo opo li ninge eemhangela dodoolopa dipe. 

Eshi nee eemhangela dipe da pwa, Amwele okwa ninga natango eindilo lonhele yaye molwelunduluko olo la etwa kopate, oyo tai popiwa apa nena. 

“Eshi osho nee sha eta elelo lodoolopa yaNdangwa li holole kutya otali ka yandja oplota kuye, ina landa onhele oyo shaashi oyaye nale. 

Eshi osha ningwa kwa landulwa omulandu noveta oyo ya pitika mwene wonhele a shangife onhele yaye oyo ya xupa ko molwa exumokomesho lodoolopa,” Shitalangaho ta fatulula. 

Elelo lodoolopa yaNdangwa ola kwashilipaleka oshiwana kutya otali twikile okutula eemhumbwe davo komesho. 

-wakudumoauleria@gmail.com