ONGWEDIVA – Omandiki oiputudilo youngomba aeshe e li koshi yepangelo okwa ninga omhangela yediladilo lokutameka omadeulo e na sha nomahooli oshoyo oikwamina moNamibia.
Mayola wodoolopa yaOutapi moshitukulwa shaMusati Selma Asino pefimbo lomutumba u na sha nediladilo lokweeta opologalama ei moiputudilo yee-VTC, okwa tumbula kutya ediladilo eli otali ka yandja ounongo kuvahapu.
Okwa twikila kutya natango otashi ka ningila Namibia shipu ngeenge ta ka mona omadeulo aa shaashi ovadeulwa otava ka dula okuninga omakonakano e na sha nelondo lomahooli, nghee ve na okushunifa ondado yomaaholi pedu shoo vati otashi ka yandja eemhito doilonga.
Pefimbo lomutumba ou Asino okwa popya kutya natango ova tala yoo keemhito domadeulo a yooloka tadi dulu okuyandjwa keeTechnical, Vocational Education and Training (TVET). “Eemhito edi otadi dulu okuxuma komesho oshikondo shomahooli noikwamina moshilongo,” Asino ta tumbula.
Okwa twikila kutya ediladiilo lokulonga omahooli moNamibia otali ka yandja eemhito koiputudilo youngoba moNamibia. “Oiputudilo ei ohai longo noudiinini ngeenge tashi ya kexumokomesho loshilongo,” Asino ta ti.
“Ohandi indile oshiwana shi tameke okutwa oiputudilo yee-TVET omukumo opo va kale ondabo yoitalendi ya yooloka moshiwana oshoyo exumokomesho loshilongo unene tuu ngeenge tashi ya kediiladilo lokueta omahooli moshilongo,” Asino ta tumbula.
Omukulunhuwiliki wehangano loPetro Fund, Nillian Muleni okwa yelifa kutya ove lilongekida okuyandja ovahongi va deuka nawa ava tava ka yandja omadeulo e na sha neuyo lomahooli moNamibia.
Ohatu ka yandja yoo eetundi da tumbulwa noda yufwa koshikondo shehongo opo tuha pukife ovanhu.
“Otwe lilongekida yoo okuyandja eemhito doilonga kwaavo tava ka mana elihongo li nasha nomahooli moNamibia,” Muleni tatumbula.
Omukulunhu woshiputudilo shaZambezi VTC Richard Kambinda okwa hokolola kutya TVET otai dana onghandangala yakula mokuyelula po eliko loshilongo ngeenge tashi ya pokuyandja omadeulo a yooloka. Okwa twikila kutya natango omukalo wa tya ngaha otau yandje eemhito doilonga edi da pumba moshilongo.