Auleria Wakudumo
Omukulunhu koshikondo shomatalululo omadu Paulus Amaambo okwa holola kutya ova didilika eedalate da fika 22 da dikwa shiheli paveta noda teelelwa dikale da hanaunwa po moshitukulwa shaHangwena.
Amaambo eshi okweshi holola pefimbo loshoongalele shookansela osho shali sha ningilwa modoolopa yaEenhana Etivali.
“Eedalate edi oda tulwa po kovanafalama ovo inava pewa epitikilo komutumba oo hau ungaunga noikumungu yedu loshiwana hano oCommunal Land Board,” Amaambo ta holola ngaho.
Edu olo vati ola nhuninwa oulifilo ndele inali nhuninwa okukala ovanhu ngaashi paife sha ningwa.
Okwa ti eedalate odo oda tavakana okudja koshitukulwa shaKavango, de ya fiyo opomudingonoko womukunda Onghalulu moshitukulwa shaHangwena fiyo okeengaba daHangwena naShikoto.
Amaambo okwa holola yoo kutya eedalate edi otadi ka hanaunwapo kouministeli womapya nounaimuna, eeshi, omeva nomatalululo omadu.
Amaambo okwa twikila ta ti ova kuta nale ovanhu ovo tave ya okuhanauna po eedalate odo ngeenge va mane oilonga ya faafana okudja koshitukulwa shaMaheke oshoyo oshitukulwa shaKavango.
Amaambo okwa fatulula kutya eedalate ihadi fikile ashike da hanaunwa po.
Okwa ti ovanhu ohava shiivifilwa oshikando shotete osho hashi ningwa kokanya, taku landula oshikando shitivali osho hashi kala elombwelo lopambelewa opo omunhu a kufe ko odalate yaye nongeenge ina kufa ko odalate yaye, nena otai dulu okuhanaunwa po.
“Omunhu ngeenge okwa shiivifilwa a kufe ko odalate yaye ndele tei kufa ko, nena kena eshi ha ningwa.
Ashike ngeenge oya kufwa ko komutumba wedu, omunhu oha futifwa, ta patululilwa oshibofa shoukolokoshi osho tashi mu twala konima yokakuma ndele ta pulwa yoo a fute oishoshela,” Amaambo ta yelifa ngaho.
Eedalate edi tadi ka kufwa ko moshitukulwa shaHangwena otadi ka kosha ongushu N$500 000.
Amaambo okwa ti oshimaliwa eshi otashi ka shunifwa po okudja meedjato daavo veli kufila oveta voovene ndele tava taulula edu needalate davo.
Amaambo okwa kunghilila oshiwana opo shi landule omilandu dedu odo da tulwa po, mwa kwatelwa okuhakufa ko edu olo la shangifwa onga omifitu doshiwana. Okwa fatulula kutya onhele ngeenge oya nhuninwa oulifilo, kashili paveta okutula po omaumbo shaashi ngaho owafa to lundulula oveta oyo ilipo nale. Ngoloneya woshitukulwa shaHangwena Kadiva Hamutumwa okwa indila ookansela voshitukulwa shaye opo va longe noudiinini.
Kadiva okwa kunghilila ovaleli opo vaha tule opolitika komesho ndele nava kwafe oshiwana.
“Ohandi indile mu longele kumwe kutya nee omwadja keengudu dopolitika da yooloka opo mu yakule oshiwana. Ovanhu ava tamu lele ihava li opolitika, onghene natu tuleipo opolitika ndele hatu yakula oshiwana,” Kadiva ta kunghilile ngaho.
-awakudumo@nepc.com.na
