EENHANA – Omhangulilo yaMangestalata mEenhana Etivali loshivike eshi oya yandja ehandu leedula 15 komulumenhu weedula 30 konima eshi a monika ondjo mekwatonghonga lokamatyona kambulavo.
Omhangu oya uda nghee Luis Sapalo Antonio a kwata onghonga okaana pefimbo kwa li ke na eedula 12 ashike paife oke na eedula 14 noke li mondodo onhihamano.
Antonio okwa li a kwatwa po momafiku 15 Juli omudo wa dja ko mekwatafano noshimbuluma shekwatonghonga sha ningilwa meumbo lavo momukunda Oshomonghudi.
Pefimbo ta yandje ehandukilo, mangestalata momhangu yEenhana Ruben Hamunyera Mutuku okwa ti okamatyona ka kwatwa onghonga ohaka shindwa kofikola kuvakwao, ka lukwa nedina Windelinus omanga omafimbo amwe ihaka i ko keetundi molwaashi ihaka kala ka manguluka.
Onghee okwa ti ekwatonghonga otali piyaaneka okamatyona pamadilaadilo efimbo keshe.
Antonio okwa li ha longo meumbo hamu di okamatyona pefimbo loshiningwanima.
Efiku tuu olo, omulumenhu weedula 24, Simon Haimbodi okwa pewa ehandukilo leedula 17 neemwedi hamano konima eshi a dipaa mumwainamati.
Oshiningwanima eshi osha ningwa momafiku 4 Apiiili 2021 meumbo lavo momukunda Ombumbuu moshitukulwa shaHangwena.
Nakufya Jonas Haimbodi okwa li a dengwa nomupini nokwa ka xulifila koshipangelo shaKatutura moWindhoek.
Okwa pangulilwa oikumungu ivali, shotete edipao omanga oshitivali oshomahepeko omomaumbo omo kwa li a denga mumwainamati noku mu teta nombele mofingo momudo 2021.
Ovatamenekwa aveshe okwa li va kalelwa po momhangu kohaende yepangelo Elina Hashipara.