Auleria Wakudumo
Oshakati – Eefikola 22 moshitukulwa shaShana oda pewa oikwafifohongo ya yooloka kombaanga yoFirst National Bank (FNB), ombaanga yoBank Windhoek osho yo elelo lodoolopa yaShakati.
Eefikola oda pewa oikwafifohongo ngaashi eelema dokuninga eekopi, eepena, omiti dokulikusha komayoo, oushina vokuvalula, eefewa dokulikosha, oudjalomwa voukadona naikwao ihapu.
Ngoloneya woshitukulwa shaShana, Elia Irimali okwa holola kutya okwa didilika eefikolo dihapu da taalelwa komashongo a yooloka ngaashi oikwafifohongo nomidjalo dofikola.
Irimali okwa ti nonande eefikola da taalelwa komashongo a tya ngaha, itashi imbi ovahongwa okuhanga omalalakano avo nokulitula mo mehongo.
“Ehongo olo natango efina lounongo aushe. Okupitila mehongo oko akuke taku dulu okulundulula eenghalamwenyo detu osho yo omidingonoko detu,” Irimali ta ti.
Irimali okwa holola yo olupandu kembaanga mbali eshi da tula oukuni kumwe mokulongela kumwe nelelo lodoolopa yaShakati okukwashilipaleka kutya ova yandja ekwafo la tya ngaha keefikola dihapu.
Okwa weda po yo kutya ovahongwa vehe na oikwafifohongo osho yo oipumbiwa yopaumwene ya wana po ohashi eta ohoni movahongwa, omuhongwa a fya ohoni okuya kofikola osho hashi eta a kanife ehalo lokuya kofikola nokukala ehe na elineekelo muye mwene.
“Onghene ekwafo loludi la tya ngaha otali tu ovahongwa omukumo. Ovahongwa otava kala ve shishi kutya ope na ou e na navo nokuvayambidida okupitila momakwafo a tya ngaha,” Irimali ta ti.
Irimali okwa twa ovahongwa omukumo opo va leshe noudiinini nokulitula mo mehongo lavo.
Irimali okwa kunghilila ovahongwa opo vaha tule omutwe moipeta ouna va taalelwa komashongo melihongo lavo ashike nava twikile okulonga noudiinini fiyo veshi fulula ko.