Auleria Wakudumo
Ouministeli wehongo, oungoba, omaudano novanyasha owa ti otau ka tunga eefikola di fike po60 moshitukulwa shaKavango East omo eefikola 25 tadi ka tungwa momudingonoko waNdama.
Ouministeli owa ti kutya owa hovela nale okutunga eengulu dofikola peenhele dimwe opo pe na nale eefikola odo inadi shangifwa nokutipikwa kouministeli. Ouministeli owa katuka onghatu ei opo u kwashilipaleke kutya eefikola edi oda shangifwa noda pitikwa kouministeli nokukala di na eemhumbwe dehongo da wana po.
Pefimbo tava talele po ofikola yaNdama moshikandjohoololo shaRundu Urban, Omuprima woshilongo Elijah Ngurare, minista wehongo, oungoba nomaudano Sanet Steenkamp opamwe nangoloneya woshitukulwa shaKavango East Hamunyera Hambyuka ova shivifa kutya ofikola yaNdama moshitukulwa shaKavango East otai ka tungwa pashinanena notai ka kala i na eengulu dokulihongela di li 25.
Hambyuka okwa ti kutya eyambulepo lofikola ei otali holola kutya ovaleli ove na oshisho nonghalamwenyo osho yo onakuiwa yovahongwa nounona vaNamibia.
“Kakele keengulu 25, ofikola otai ka kala yo i na ebloka leembelewa, oundjuwo ve na eepomba dokulikosha osho yo ouloka vovahongwa noluumbo lofikola,” Hambyuka ta holola ngaho.
Epangelo otali ka tunga yo opate, olusheno, nokuwedela ominino domeva okudja memboola odo di li popepi. Omayakulo ngaashi olusheno, omeva nopate otaa ka kwafela ovakwashiwana ovo ve li popepi nofikola yaNdama.
Epangelo ola udaneka kutya otali ka yandja eetenda ongekwafo lopakafimbo okukwashilipaleka kutya ovahongwa otava twikile okuya kofikola nefimbo lokulihonga nokulonga ovahongwa inali piyaanekwa kusha.
Etungo lofikola yaNdama nomatungo amwe a wedwa po okwa teelelwa taa ka tulwa moilonga muJanuali omudo tau ya.
Omuprima okwa indila ovakwashiwana opo va hangane okulongela nokukwafa epangelo meemhangela dexumokomesho.
Ofikola yaNdama otaku hokololwa hai shiti ounona ovahongwa tava hange po600. Ofikola vati oi na ashike ovahongi 14 ovo va pyokoka okulonga ovahongwa omanga vamwe vomuvo inave lilongela okuninga ovahongi. Ovahongwa meengulu dihapu ohava longelwa koshi yomuti. Ofikola ei otaku hokololwa yo ihe na omeva, oundjuwo ile olusheno.