Omukulunhuwiliki wehongo moshitukulwa shaHangwena Isak Hamatwi okwa koleka ta ti eefikola mbali oda patwa shaashi di li koshi yomeva.
Eefikola odo Oshingunguma Primary School noshoyo Onghala Combined School.
Hamatwi okwa ti mopaife ngaha ovanafikola novahongifikola ove li komaumbo va teelela omeva apwiinine.
Ovanafikola kofikola Uudjombala Junior Secondary School ohava di meetenda di li mofikola molwashi eendjila odo hava ende odi li koshi yomeva.
Omaandaxa ngoloneya woshitukulwa shaHangwena Sebastian Ndeitunga noshoyo omukulunhu wopolifi moshitukulwa shaHangwena Commissiioner Otillie Kashuupulwa, ova taalela po eefikola odo da pata.
Elalakano opo va kundafana nghene ovanafikola tava ka yambididwa.
Hamatwi okwa ti omeva okwa nyika oshiponga shaashi ota dulu okudipaa ovanafikola.
“’Otwa pata eefikola molwashi ina tu hala okuuda omunafikola a xulifila momeva,” ta ti.
Okwa weda po eendjila odo hadi shingwa eetuwa dovahongifikola nado odi li koshi yomeva.
Hamatwi okwa kumaida ovanafikola opo vangungumane ve li komaumbo fiyo onghalo ya tya po xwe po.
“Ovadali nava popye nounona opo vaha danene momeva ngeenge tava lifa,” ta ti.