Auleria Wakudumo
Ouministeli wehongo, ounghulungu nomufyuululwakalo owa pula eefikola di yandje omhito kovanafikola okudimbuluka Omukokolipresidente Sam Nujoma nomaimbilo, outevo nokutanga ekufombinga laye mexumokomesho laNamibia.
Ouministeli owa pula yo eefikola di shunife monima engudumano lomaudano mwa kwatelwa okutondoka, okatanga kokeemhadi naikwao ihapu.
She likolelela komukanda wa pitifwa komukulunhuwiliki moshikondo shehongo Sanet Steenkamp Etivali, nande engudumano lomaudano la ngabekwa, eefikola oda pitikwa okutwikila omaudano taa ningilwa ashike meefikola.
Steenkamp okwa holola ta ti eefikola, eengulumambo neenhele domauyelele moshilongo oda teelelwa di tulike omapandela ado etata, okudimbuluka Nujoma.
Eefikola oda pulwa yo di kale tadi kufa okafimbo kelimweneneno pokuongala kwavo okudimbuluka Omukokolipresidente.
Ouministeli owa shiivifa kutya eembelewa adishe dehongo otadi ka kala di na omafano aNujoma poivelo osho yo omambo.
“Omafano Omukokolipresidente naa kale a tulwa poshivelo shombelewa keshe yehongo okudja koshitukulwa, koshikadjohololo nopeefikola pwoovene osho yo embo lokushangwa omahekeleko noulexite, opo ovahongwa, ovahongi novakwashiwana pomudingonoko va holole omaliudo avo kombinga yefyo laNujoma,” Steenkamp ta ti.
Steenkamp okwa weda po ta ti ovanambelewa vehongo keembelewa doitukulwa mekwatafano loikandjohololo otava indilwa opo va unganeke efiku lokudimbulukwa Nujoma moitukulwa yavo.
Steenkamp okwa ti omilandu dofikola ngaashi omatalelepo momihandjo dofikola ile kofikola, omapulapulo oilonga naikwao otai twikile okukwafela oidjemo yehongo onghee nai pule komesho.