Auleria Wakudumo 

Omukulunhuwiliki mouministeli wehongo, oungoba, omaudano novanyasha Mbumba Haitengela okwa yandja elombwelo lomeendelelo keefikola dopaumwene moNamibia odo hadi yandje ekonakono lomufindalandu we likalekelwa wondodo onhi-12 opo ve lishangife naado da tambulwa ko kouministeli. 

Omukulunhuwiliki okwa ti ovahongwa keefikola dopaumwene ovo va shangifwa nolutu olo tali ifanwa oInternational Secondary Certificate (IEB-ISC) otava dulu va kale inava tambulwa koiputudilo yopombada moNamibia osho yo kondje yoshilongo. 

“Eshi otashi dulu okuya elihongo lopombada lounona moshipala, osho yo okukala inava mona oilonga nokushunifa pedu omaifano avo,” Haitengela ta holola ngaho. 

Haitengela okwa ti oInternational Secondary Certificate (IEB-ISC) inai shangifwa nokutambulwa ko koNamibia Qualifications Authority (NQA) ile koSouth African Qualifications Authority (SAQA), hano ehangano laSouth Africa olo hali pitike eedjapo donhumba. 

Haitengela okwa fatulula kutya omulandu wehongo lopedu hano oBasic Education Act, okatendo katitatu ko-2020 osho yo oBasic Education Regulations, okatendo k62 kotete C oka holola kutya eefikola adishe dopaumwene nadi shangife ovahongwa vado meendelelo koDirectorate National Examinations and Assessment (DNEA) hano oshikondo osho hashi undaunda nekonaakono moNamibia opo va kwashilipaleke kutya omakonaakono avo okwa shangifwa nokupitikwa ngaashi ouministeli tau ti. 

Ouministeli wehongo owa holola kutya eefikola odo itadi ka landula elombwelo eli otadi ka tula ekonakono lovanafikola moudjuu osho tashi ka kala shi na oshilanduli shii kuvo. 

“Onghene ohatu indile eefikola dopaumwene opo di katuke onghatu ei meendelelo. Eefikola nadi shi ninge momukalo wokushanga,” Omukulunhuwiliki ta indile ngaho. 

Ouministeli owa kunghilila eefikola dopaumwene opo di landule omilandu dehongo ngaashi da tulwa po kouministeli opo ku amenwe elihongo neifano lovahongwa monakudiwa. 

-awakudumo@nepc.com.na