RUACANA – Aakalimo yomolukanda Okonyota moshikandjohogololo shaRuacana mboka ya kala po okuza omimvo dha pita 40 oya ndhike oonyala mevi kutya itaya tembudhwa oshoka oshimaliwa ya uvanekelwa okufutwa oshishona noonkondo.  

Elelo lyondoolopa yaRuacana olya uvaneke okufuta aakalimo okuza poshimaliwa N$300 okuya pombanda, opo anuwa ya ze po pehala mpoka ye li pu etwe ehumokomeho.

Omunambelewa omukuluntu melelo lyondoolopa yaRuacana Malakia Ileka okwa ti aakalalimo yopolukanda Okonyota otaya tembudhwa omolwehumokomeho.

Ta fatulula kutya aantu mboka oye li pehala lyamuni, mpoka ya kala ashike haya hiila, nonande ya tunga po oombashu nomakuma gawo. 

“Nonando twa kala nokufatululila oshigwana elalakano lyetembudho naashoka sha tokolwa po, ope na yamwe yi iningi omitse omikukutu, inaaya hala okutsa kumwe netokolo lyelelo lyondoolopa,

“Elelo lyondoolopa ihali tala ongushu yetungo nenge lyombashu, ihe mbyoka iilonga yuuministeli wuunamapya. Out li metifa okushanga olopota kombinga yaakalimo sho ya tokola po,” ta fatulula ngaaka.

Mayola gwondoolopa gwaRuacana Linda Mbwale okwa yelitha kutya hakehe gumwe ta gumwa kehumokomeho.

“Ngoka a hala okukala mpoka e li ita thiminikwa okuza po, ihe oku na okukonga uumwene wevi okuza kelelo lyondoolopa, ta futu iifuta yi li po,” ta po pi ngaaka.

Ta gwedha po ta ti, mpoka taya tembudhilwa kaku shi kokule naampoka taya tembudhwa. 

Maria Shivute ogumwe gomwaamboka ya tseyithilwa kutya otaya tembudhwa , okwa ti ita tsu kumwe niimaliwa tayi popiwa.

“Oya hala tu taambe iimaliwa mbyoka tayi ka longa shike, osamende oyi na ingapi paife noku ka zuulula ko okutunga, shoka taya dhiladhila itashi shiwa,” ta nyenyeta ngaaka.

Simon Shikomba gumwe gomaakalimo yomOkonyota okwa ti, oshike itaaya fatululilwa nawa mpoka taya tembudhilwa.

“Otwa hala omahala ge na olusheno nomeya, inatu hala omeya gomomithima,” ya  popi ngaaka.

Ta gwedha po kutya sho kaye shi okulesha, itashi ti kayu uvite ko.

Aakalimo yamwe esiku ndyoka natango oya nyenyeta kutya elelo lyondoolopa lyawo olyu udha uulingilingi, kalyi na naantu yawo oshoka oye wete kutya oyendji inaya mona elongo lya gwana.

Mwene gwomukunda Okarano, Iipinge Shilongo okwa ti, omagumbo  ogendji moshikandjohogololo shaRuacana oge na omeya ga pata oshoka aantu oya hulile muunyengwi okufuta sho omayakulo gamuni ngoka haga kala ge li pombanda noonkondo.

Ta ti, omeya gawo ohaga piti okuza N$800 sigo N$6 000 komwedhi.

Ta pula kutya omolwashike muni a kuthila ko oshinakungithwa shokwaadjaneka omeya kuNamWater ye a pule oshigwana iimaliwa yi li pombanda. 

-vkaapanda@nepc.com.na