ONGWEDIVA-Omunambelewa mehangano lokuyandja ohonde konooli loNAMBTS Adolf Mwafangeyo okwa pandula oshiwana eshi hashi holoka momwaalu munene okukayandja ohonde molwashi paife onghalo ondjele yohonde meemhungulilo domoipangelo paife oya xwepopala.
Okwa ti okudja ketameko lomwedi ou ovanhu ova hooloka momwaalu muhapu okukayandja ohonde mokufafanifa neemwedi da pita.
Okwa hokolola ta ti omudo wadja ko momeemwedi dapita ehangano lavo kala li ta li dulu okuyandja ohonde kovanaudu molwashi ka pena ohonde.
Mwafangeyo okwa pandula natango ovanafikola koiputudilo nokeesekundufikola molwashi ova kala alushe ve na ohokwe okuyandja ohonde.
Okwa kumaida oshiwana opo shi twikile okuholoka momwaalu muhapu okukayandja ohonde molwashi ohonde oya fimana kovanaudu.
Okwa ti NAMBTS ota twikile okukwashipaleka kutya ovanhu ve li momhumbwe yohonde koipangelo ova pewa ohonde opo eemwenyo davo di xupifwe.
“Ohonde ei tai yandjwa koshiwana ohai kwafele ovanhu vena omikifi da yooloka ngaashi okangela, pefimbo oomeme tava pulumuna, omunhu ngeenge ta tandwa nosho tuu omikifi dikwao,” ta ti.
Okwa lombwela oshiwana opo shitopolafane ouyelele kombinga yefimano lohonde opo ovanhu va kale ve na eudeko lawana nokukala ve na ohokwe yokuyandja ohonde.
Okwa ti endiki lavo olo li li moshipangelo shaShakati oha li longo Omaandaxa keshe okudja 10h00 fiyo 18h00 oshivike keshe.