Taimi Haihambo 

Ongwediva – Ongeleka yedina Jesus Reign Church ya shivika nawa nedina “Shipindo Church,” oya ponokelwa kookalyamupombo oufiku wOmaandaxa, ndele tava vake mo oinima i na ongushu yoN$144 000. 

Mwene wongeleka Kambonde Wycliffe, oo e li yo pastoli wongeleka okwa ti pongeleka okwa dja po Osoondaxa pombali yoshanga shomutenya. 

“Omaandaxa onde ke ya kongeleka nde ya okuninga oinyangadalwa yange ngeno. Eshi nda fika pongeleka onda kundwa ashike komuvelo wa yeuluka kashona,” ta ti. 

Vati eshi a ya mongeleka okwa didilika oinima ihapu yongushu ihe mo. 

Oinima ei a didilika ya vakwa mo okaxumba, omambako ahamano, ongoma yokudenga eengalo, oumbako vokupopila naikwao ihapu ya nyika oungoba hai longifwa kongeleka. 

“Eshi shi nyematifa unene osheshi kutya oinima ihapu ei ya vakwa po oya ya moimaliwa yovanhu,” ta ti. 

Ookalyamupombo eshi ve ya okuteya tete vati ova li va hala ngeno okupitila mekende, eshi va nyengwa vati okuteya po ekumba olo la li la pata omuvelo wongelekeka. 

Fiyo opapa ovafekelwa inava monika, ashike Kambonde pamwe nopolifi otava pula oshiwana shi kwafele mokulopota ovanhu ava. 

“Ngeenge omwa mono omunhu ta landifa omambako, ile oumbako vokupopila osho yo okaxumba kwafei nge mu dengele opolifi ile kongodi ei +264 81 41 000 19,” ta ti. 

-taimihaiahmbo2000@gmail.com