ONGWEDIVA – Okudja ketameko lomudo, eembwa 40 098 noumbishi 1 987 oda tunhilwa omukifi wendabi koitukulwa ya yooloka.

Ouministeli wounamapya, omeva netulululo lomadu otau twikile noshikonga  shokutunhila eembwa noumbishi omukifi wendabi.

Omukifi wendabi omukifi ou hau etwa ngeenge omunhu a lumatwa kombwa ile kumbishi ina tunhilwa.

Omukifi wendabi owa nyika oshiponga shaashi ohau eta omunhu a xulife.  Omupopiliko wouministeli wounamapya Jona Musheko okwa ti elalakano lotunhila opo ku kelelwe etandavelo lomukifi wendabi okudja keembwa wa uka kovanhu.

“Ouministeli otau lalakanene okukelela ovanhu vaha fye komukifi wendabi,” Musheko ta ti.

Okwa weda po ta ti etunhilo leembwa otali kelele yoo vali oimuna ngaashi oikombo neengobe iha kwatwe kendabi. “Oimuna nayo oya ninga oihakanwa yokulumatwa keembwa unene tuu komikunda,” ta ti.

Onghee kwa ti oshikonga shetunhilo leembwa noumbishi osha fimana molwaashi otashi kaleke po oundjolowele woinamwenyo yomomaumbo. Okwa ti oshikonga otashi ka ningwa koitukulwa ihetatu mwa kwatelwa yomonooli oyo ya didilikwa unene haku lopotwa eembwa da kwatwa kendabi.

Neudo minista wounamapya Calle Schlettwein okwa popya ta ti okudja omudo 2016 Namibia okwe shi endifa nawa okulwifa omukifi wendabi molwaashi omwaalu wovanhu va kwatwa kendabi owa shuna pedu.

“Omafyo ovanhu va fya va kwatwa kendabi okwa shuna pedu. Ovanhu ashike vavali va fya komukifi wendabi hava lopotwa momido da pita mokufaafanifa novanhu 26 va lopotelwe konima yomudo 2016,” minista ta ti.

 Okwa kumaida oshiwana opo shi twikile okutwala eembwa davo ketunhilo molwaashi osha fimana.

“Eembwa di na omukifi wendabi nadi lopotwe pefimbo opo di tunhilwe diva ,” ta ti.

Musheko okwa pula oshiwana opo shi longele kumwe okukelela etandavelo lomukifi wendabi momidingonoko davo. “Omunhu ngeenge a lumatwa kombwa na twalwe koshipangelo meendelelo opo a ka vendwe,” ta ti.

-fhamalwa@nepc.com.na