Eemiliona N$665 otadi ka longifwa oku wapaleka konhele yoku pungula omeva oo taadi komulonga waKavango nelalakano okukwashipaleka kutya oshiwana otashi mono omeva awana.

Edi oda popiwa kuminista wounamapya, omeva, netululo lomadu, Calle Schlettwein pefimbo kwa li ta patulula oporongalama yokuwapaleka konhele yomeva Omaandaxa koRundu.

Minista wounamapya melongelokumwe nehangano lokuyandjaneka omeva loNamWater ove li pyakidila koitukulwa ya yooloka okutula moilonga ewapaleko leenhele odo hadi ongele omeva.

Schlettwein okwa ta talela po oitukulwa shaMusati, Oshana nOhangwena omo kwa li a shakena novaleli vayooloka okukundafana omukalo wokukandula po omhumbwe yomeva.

 Eemboolo lomeva koshi yedu moshitukulwa shaHangwena na lo ota li ka tameka neudo.

Minista okwa ti ombelewa yaye nehangano loNamwater otava twikile okulongela kumwe okuyandjaneka omeva koshiwana mwa kwatelwa eedoolopa.

Okwa ti okulonga onhele oyo hai ongele omeva i li modoolopa yaRundu otashi kandula po omukundu wonhumbwe yomeva modoolopa.

“Paife omeva otaa ka enda nawa pehe na omashongo. Oshiwana sha dja komikunda da dingonoka odoolopa yaRundu otashi ka mona ouwa wokumwa omeva a yela,” ta ti.

Okwa hokolola ta ti omeva okwa fimana shaashi oha yambula po oshikondo shounamapya ngaashi okulongifa moikunino noshoyo okunuwa koimuna.

“Omeva otaa twikile nokudana onghandangala ya kula mokuyambula po eliko loshilongo,” ta ti.

Okwa ti ngeenge pena omeva otashi yandje omhito koshiwana okutotapo oikunino younamapya naashi otashi pitike oshiwana shi landifa oikunomwa yavo.

“Omeva otaa lwifa ondjala noluhepo unene tuu ngeenge taa longifwa koshikondo shounamapya. Ngeenge ka pena omeva omunhu ita dulu okukala ta nwefa oimuna yaye ile ta tekele moshikunino shaye,” ta ti.

–fhamalwa@nepc.com.na 

Omeva… Minista Calle Schlettwein okwa patulula etulo moilonga lokuwapaleka eenhele domeva.

Efano: Otwe li pewa