CAPE TOWN– Ovashingi voituwa vahapu moCape Town ova longifa exwaxwameko tali ningwa kepangelo lopashitukulwa opo va fute outekete (eebuta) vavo omanga efimbo lomatango manene ina li fika.
Momushangwa wa pitifwa kelelo lodoolopa yaCape Town otau holola kutya ovanaihauto ve dulife po4,000 ova longifa omhito oyo yoshinyangadalwa shaCape Town Civic Centre opo va fute outekete vavo. Omwaalu u fike pomiliona R1.3 owa ongelwa po nale nokuli. Oshikondo shopaveta mekwatafano naasho shovapolifi vomeendjila ovo va longela kumwe opo va twale omayakulo popepi novashingi voyeendifo oshivike eshi.
Ovashingi voyeendifo ovali yoo ve na omhito okupula efilonghenda opo va filwe onghenda noku kufilwa ko koimaliwa yomahandukilo nosho yo keemhangale odo da tulwa po opo ngeno va tulwe konima yekumba molwa oku ha landula eemhango domeendjila.
“Elelo ola tokola opo li twale omayakulo koshiwana notwa tokola oku wanifa po omaudaneko etu. Oshinyangadalwa osho tashi ningilwa pomikunghulo deendjila otashi twala oshikondo sheepate noshouyuuki ashishe melelo kovanhu, neendelaiva otadi dulu okupula efilonghenda nokutala yoo ngeenge odi na ko outekete ile pamwe ope na omhangela opo di ka patelwe konima yekumba.
“Pefimbo eli lomudo ovanhu ohava kala veli pyakidila neenghono, no kave na naanaa efimbo loku ya keembelelwa, sho osho nee sha eta etokolo opo tu tule omayakulo aeshe moshimbaba shimwe peenhele opo tava hange noupu. Onda pandula unene eshi ovanaitukutuku veli nyeka koilonga yavo ndele tava kala va teelela opo va mone omakwafo,” osho oshilyo shimwe mokakomitie kelelo, Sharon Cottle a ti. (NAMPA / ANA)