ONGWEDIVA- Omukulunhu mupe wopolifi yomoshilando pangelo Leevi Shivolo Ileka okwa ti ombelewa yaye otai ka kwashipaleka kutya ovanafikola itava ka ningilwa omawelelo pefimbo lomakonakono.
Okwa ti okwa didilikwa ovanafikola hava piyanekwa nomawelelo okudja meengeleka noshoyo meendingosho pefimbo lomakonakono.
Onghee okwa ti omunhu keshe ta hangika ta ningi omawelelo ina ehe na epitikilo okudja kombelewa yelelo loshilando otaka pewa ehandukilo lokufuta oshimaliwa ile aye modolongo ngeenge ite li ufa keemhango.
Ileka okwa ulikwa a ninge omukulunhu wopolifi yomoshilandopangelo Omaandaxa. Okwa ya ponhele yaAbraham Kanime ou a ya mopendjela.
Meenghundafana va ninga naKundana Etine Ileka okwa ti omunhu ta ningi ewelelo lwoshikando shotete ota pewa ehandukilo a fute N$1000 omanga omunhu ou ta twikile nokuninga omawelelo lwoikando ya yooloka ota pewa ehandukilo loshimaliwa N$2000. Onghee okwa kumaida ovakalimo vomoshilandopangelo opo va fimaneke omilandu da tulwa po noshoyo okukatala omikanda depitikilo ngeenge va hala okuninga ewelelo meengeleka ile meendingosho nopoitufi yomalihafifo.
“Ohandi twikile okuxwaxwameka ovanambelewa vopolifi yomoshilandopangelo noshoyo okulongela kumwe novapolifi vepangelo noshiwana mokukondjifa oimbuluma moWindhoek,” Ileka ta ti. Okwa ti opolifi otai twikile nokuninga oshikonga oufiku momapandaanda nelalakano okukelepo eameno loshiwana ngeenge tashi ende oufiku okukelela oshiwana shiha nyekwe omaliko. fhamalwa@nepc.com.na
“Oshiwana nashi kale shina ekwatafano liwa nopolifi noshoyo oushiinda muwa shaashi eshi otashi kwafele okulwifa oumbuluma unene tuu omatewo omaumbo,” ta ti.
Ileka okwa kumaida yoo vali oshiwana opo shi xulife po okulanda oinima ya vakwa ile oinima ihe na eembapila.
“Omunhu ngeenge okwa hangika e na oshinima ndele kena sha omikanda tadi yandje ouyelele kombinga yoinima oyo ota ka kwatwa po shaashi osha nyika oumbudi,” ta ti.
Onghee okwa ti osha fimana opo omunhu a kwashipaleka kutya ota pewa eembapila doshinima osho a landa kumukwao.
“Oshiwana nashi xulife po okuholeka ouyelele kopolifi ile okuholeka ovakwapata vavo ngeenge va longa oimbuluma,” ta ti.