Auleria Wakudumo
Eendokotola da hanga po11 oda hovela okuliyamba moshipangelo shepangelo shaKatuturta moWindhoek onghela.
Eendokotola otadi kala tadi liyambe okudja po17h00 fiyo opo 23h00.
Okudja eshi Minista wouhaku nonghalonawa, Dr. Esperance Luvindao a ninga eindilo opo eendokotola dopaumwene di liyambe okukwafela ovanaudu moipangelo yepangelo, ouministeli owa holola kutya owa mona omwaalu muwa weendokotola da hala okuliyamba.
Eendokotola de liyamba odo: Julia Kamati, Magdalena Kapofi, Cornelia Ndifon, Saara Nasheya, Hileni Shailemo, Helao Silas, Nikanor Shapaka, Mclin Rusakaniko, Tangi Shiweva, Rovisa Shikombo, osho yo Johana Nelumbu.
Omupopiliko wouministeli wouhaku Walters Kamaya okwa ti ouminsteli owa pumbwa ekwafo leendokotola edi molwaashi oipangelo ya yada ovanaudu.
“Oshitukulwa shaKhomas osho shimwe shomoitukulwa I na ovanhu vahapu moshilongo osho sha hala okutya novanaudu ova hapupala moipangelo,” Kamaya ta holola ngaho.
Minista okwa holola olupandu keendotola edi de liyamba okukwafa epangelo. Okwa ti okulonga oilonga ihe na odjabi otashi holola kutya otava longo oshilonga inashi monika mo nale moNamibia.
Ouminsteli otau shivifile oshiwana kutya otau wedele eevili doilonga koukilinika.
“Okakilinika mOkuryangava osho yo Otjomuise paife otava kala tava patuluka 07h00 yongula fiyo opo17h00 okudja Omaandaxa fiyo Osoondaxa.
Eshi osha ya nale moilonga okudja onghela,” Kamaya ta ti.
Ouministeli owa holola yo kutya otau ka wedela vali eevili doilonga pokakilinika kaKuryangava opo ka kale haka longo oule wefiku alishe okudja mu1 Aguste neudo.
Ouministeli owa ti otau tula moilonga ediladilo loukilinika vahapu op ova kale hava longo efiku alishe.
Ouministeli owa shiivifa yo kutya otau wedele omwaalu weekotokola odo hadi longo oufiku.
Eendokotola otadi wedelwa okudja peendokotola nhatu fiyo opeendokotola nhano moshipangelo shaKatutura.
“Eshi otashi ningwa opo ku shunifwe omwaalu wovanaudu ovo hava holoka oufiku pedu. Oshipangelo shaKatutura osho hashi mono omwaalu wovakwashiwana muhapu okudja po19h00 fiyo omokati koufiku,” Kamaya ta ti.
Kamaya okwa ti omwaalu wovakwashiwana ohau hapupala oKatutura molwa oukilinika ava va pata.