ONANDJOKWE – Ovakainhu otava nyenyeta kombinga yeendokotola koshipangelo shaNandjokwe vati tadi va ngabeke va patwe okumona ounona.
*Lusia Sheefeni (Kali shi edina laye loshili) weedula 38, e na ounona vatatu a dile komukunda Evale moshitukulwa shaShikoto okwa hokolola ta ti okwa ya koshipangelo shaNandjokwe ta pula eendokotola opo a patwe oludalo ashike inadi hala oku mu pitika.
“Ndokotola okwa pula nge kutya ondi na ounona vangapi needula dange. Okudja opo okwa lombwela nge ta ti natango ondimushona nounona vange vatatu inava wana onghee onda pumbwa natango okudala fiyo ounona vatano,” Sheefeni ta hokolola.
Okwa ti okwa hala okupatwa oludalo molwaashi ke na oyuuyemo, ye naxe younona vaye iha longo.
“Ngeenge onda twikile nokudala ounona vahapu olye te va yambidida? Okaana oha kala pula oshimaliwa opo ka dule okuyambididwa, noikulya oshoyo oidjalomwa,” ta ti.
Sheefeni okwa ti ounona ovo e na ova wana onghee ina hala vali okuweda ko tuu nande.
“Ovakainhu vopaife ohatu kengelelwa kovalumenhu ngeenge hatu i navo moixulo, onghee naashi ohashi eta opo omukainhu a ninge eteelelo ine shi teelela,” ta ti.
Okwa weda po ta ti ovalumenhu vamwe ohava faduka po ounona wavo ile e likale okaana kutya kake shi kaye.
Onghee ovakainhu ovo ashike tava mono oixuna yokufila ounona oshisho.
Omukainhu umwe e na eedula 35, e na ounona vavali okwa nyenyeta ta ti naye okwa li a ya koshipangelo shaNandjokwe ta pula a patwe oludalo ashike okwa shunifwa ko molwaashi vati eedula daye odishona nokukwata ovenda yokupata oludalo.
“Inatu hafela oshikumungu eshi. Koipangelo imwe eendokotola kadi na omhinge yokupata ovakainhu va mone oludalo,” ta ti.
Eshi a kwatafana naKundana omukulunhuwiliki wouhaku moshitukulwa shaShikoto Joshua Nghipangelwa okwa ti ota ka kala omutumba neendokotola opo va kundafane kombinga yoshikumungu eshi.
Nghipangelwa okwa ti okupata omukainhu oludalo kasha shi oshinima shipu molwaashi ovakainhu vamwe ohava popi oipupulu kutya inava hombolwa ashike konima ngeenge okwa patwa oludalo oha ka aluka nomushamane waye ta nyenyeta kutya okwa hala mboli okukala ta mono ounona.
Onghee okwa ti osha nyika oshiponga okupata omukainhu oludalo.
Omukulunhuwiliki woshipangelo shaNandjokwe Dr Rwehumbiza Saad okwa ti ovakainhu tava nyenyeta kombinga yokuhapitikwa okupatwa oludalo nava kwatafane nombelewa yaye opo va dule okuyandja omanyenyeto avo.
“Out na omiti da yooloka hadi longifwa okupata omukainhu oludalo. Onghee omafimbo amwe ohashi dulika di kale dihe mo moshipangelo pefimbo omukainhu ta pula a patwe,” ta ti.