OSHAKATI – Eengobe modoolopa yaShakati oda ninga oihakanwa yokudipawa kookalyamupombo ovo tava dipaa eengobe noku kufa ko oinhumbu inadi yuvwa, vo tave di fiye opo. 

Omupopiliko wopoilifi moshitulukulwa shaShana Inspector Frieda Shikole okwa hokolola ta ti Osoondaxa okwe li tuwa ongobe ya fya ya tetwa oshilama. 

Okwa yelifa ta ti okwa didilikwa ovanhu hava tete eengobe omifipa dokomaulu nongobe ngee yeli denge po nokufya, ohava tete ko oilama noinima yomedimo ndele tava faduka po. 

Shikole okwa ti natango Omaandaxa okwe li tuwa eengobe mbali modoolopa yaShakati da tetwa komifipa. 

“Fiyo opapa ka pena omunhu a kwatwa po kombinga yoshikumungu eshi. Omakonakono opolifi otaa twikile,” ta ti. 

Okwa ti oovene vongobe oyo ya dipawa Osoondaxa ova iwa navo mekwatafano shaashi okwa li ina oupapa komatwi. 

“Oovene veengobe odo da dipawa Omaandaxa inava monika shaashi kadi na sha oupapa komatwi,” ta ti. 

Okwa kumaida oshiwana opo shi yandje ouyelele kopolifi kombinga yovanhu tava tete eengobe omifipa. 

Shikole okwa ti odoolopa yaShakati oyo imwe ya didilikwa mu iyadi eengobe tadi endaenda modoolopa. 

“Ovanhu hava di popepi nodoolopa yaShakati nava idilile oimuna yavo molwashi osha nyika oshiponga ngeenge ongobe tai nangala modoolopa,” ta ti. 

Okwa weda po ta ti ongobe otai dulu natango okueta oiponga yomeendjila, uneene efimbo loufiku omo hadi kala tadi tavakana momapandaanda nodi hole unene okufikama mopate. 

“Eengobe dimwe ohadi yi meni lehoofa dovanhu ndele tadi lipo oimeno,” ta ti. 

-fhamalwa@nepc.com.na