ONGWEDIVA-Omupedu Hamushangadjai woSwapo Uahekua Herunga okwa lombwela eengudu domilamheno opo di xulife po okunyenyeta kutya omahoololo kahe li pauyuuki. 

“Okudja lwoshikando shotete Namibia a ninga omahoololo eengudu domilamheno ota di nyenyeta kutya oidjemo yomahoololo kai li pauyuuki,” ta ti. 

Pefimbo a ninga eenghundafana naKundana onghela Herunga okwa ti eengudu domilamheno ngeenge oda mona omawi a shona ohadi lundile Swapo kutya okwa longifa oulingilingi okufindana omahoololo. Oshivike sha djako Namibia okwa li a ninga omahoololo Oupresidente noshoyo oilyo yomutumba wopashiwana. 

Eengudu dopapolitika 15 okwa li da kufa ombinga momahoololo. 

“Oveleli veengudu domilamheno nave li honge okutambula ko oidjemo yomahoololo ngaashi naana i li. Ka pena oulingilingi wa longifwa molwashi ngeenge oidjemo tai va lulwa oha pa kala ovakaleli po va dja keengudu dopapolitika da yooloka,” a yelifa. 

Herunga okwa ti okudja oshilongo sha manguluka ka pena ongudu yomilamheno ya popya kutya omahoololo okwa ningwa pauyuuki. 

“Swapo ongudu ya kula molwashi itai helekwa noungudu yopapolitika ovo opo va totwa onghela. Swapo ongudu i kwetelwe komhesho kovaleli ve na ondjungu noukumwe,” ta ti. 

Herunga okwa weda po ta ti Swapo oku na ashike okufindana efimbo keshe ta ku ningwa omahoololo. 

Okwa kumaida oshiwana opo shi kale nombili pefimbo loidjemo yomahoololo tai shivifwa. 

“Oku li tuka ile omalipumo mumwe ovanhu va dja keengudu dopapolitika da yooloka ita ku kwafelesha ashike otashi uulike efano lii,” ta ti. 

Okwa yelifa ta ti Swapo okwa kanifa omawi ngaashi kodoolopa yaWalvis Bay ashike Swapo ita nyenyeta kombinga yomahoololo ehe li pauyuuki. 

“Oidjemo yandja koWalvis Bay noshoyo keedoolopa dimwepo otwe i tambulako nombili pehe na omanyenyeto,” ta ti. 

Herunga okwa popya vali ta ti ovanhu na va xulife po okuxwika po omapandela oSwapo molwashi eengudu davo ina di findana omahoololo. 

Mexuliloshivike ovalumenhu vavali ova kwatwa po shaashi vati va xwika po omapandela Swapo. 

Oshiningwanima osha ningwa kodoolopa yaPuwo moshitukulwa shaKunene efimbo lokomatango. “Paife otava longele omapandela oSwapo ominyonena molwashi eengudu davo da mona omawi a shona,” ta ti. 

-fhamalwa@nepc.com.na