Helao Ndawedapo
Ovanafikola kofikola Ekangolinene Combined ova fiwa pomutenya konima eshi eengulufikola nhatu davo da teywa po komhepo mexuliloshivike efimbo lokonguloshi.
Eengulu da pepwa po ohadi longelwa ovanafikola vondodo onhinhatu, eveshe kumwe ve li 100.
Ofikola Ekangolinene Combined School oi li moshikandjohoolo Etayi moshitukulwa shaMusati.
Kape na omunhu a lopotwa a monena oshiponga meengulu molwaashi oshiningwanima osha ningwa pefimbo kuhe na eetundi.
Omukulunhufikola pofikola Ekangolinene Dasken Mushabati okwa ti ombelewa yaye oya lopotela omukulunhuwiliki wehongo moshitukulwa shaMusati kombinga yoshikumungu.
“Ovanambelewa okwa li va fika pofikola yetu nokukundafana nafye nghene tu na okukandula po omukundu ou,” ta ti.
Mushabati okwa hokolola ta ti ounona ve li mondodo onhinhatu inava tumwa komaumbo molwaashi otava kala va shaale po koinyangadalwa yavo yofikola.
Onghee okwa ti osha fimana opo ounona va pewe eetundi de lixwa po unene tuu ketameko loshikako shotete.
“Otwa ninga onghendabala yokulongifa etungo hali longelwa eetundi dokompiuta omanga vamwe otwe va twala ketala oku haku ningilwa omitumba dovadali,” ta ti.
Onghee okwa ti ofikola yavo otai lalakanene ehongo longushu kokaana keshe opo ounona va pite noidjemo iwa kexulilo lomudo.
Lwopokati opo, omukulunhufikola okwa ti ofikola yavo oya pumbwa eengulu dokulongela di li hamano molwaashi ovanafikola vamwe ova finana mo meengulu omanga vamwe ohava longelwa moipeleki.
“Otu na yoo vali eshongo lombelewa yokukala ovahongifikola shaashi ovahongifikola ve li 38 ohava longifa ombelewa imwe, va finanamo omanga omafimbo amwe ovahongifikola vamwe ohava kala koshi yomuti ile meetuwa davo molwaashi kape na onhele,” ta ti.
Mushabati okwa indila ovanangeshefa, ovanapolitika noshoyo omahangano opaumwene opo e uye okuyambidida ofikola yavo noikwafifohongo.
* Helao Ndawedapo omunambelewa wouyelele kouministeli womauyelele nomakwatafano opaungomba.