Minista wehongo Anna Nghipondoka okwa ti eengulumambo ota di twikile okudana onghandangala okuyandje omayakulo koshiwana mwa kwatelwa ovanafikola.
Edi Nghipondoka okwe dipopya Etitano pefimbo letyapulo lekalepo leedula 10 longulumambo oyo i li komukunda Ohangwena moshitukulwa shaHangwena.
Ovanafikola, ovakwashiwana mwa kwatelwa ovaleli vopamufyuululwakalo noshoyo ovawiliki wehongo okwa li va ngundumana okudimbuluka efimano longulumambo.
Ongulumambo ei oya tungwa momudo 2014 nelalakano lokuyandja omayakulo koshiwana.
Ovanyasha ovo unene hava holoka momwaalu muhapu okukakonga omayakulo kongulumambo ngaashi okuninga omaindilo oilonga, okupewa eetundi dokompiuta noshoyo okuninga omapekapeko oilongwa yavo yofikola.
Kongulumambo ei oha ku kala kuna omambo eetundodo da yooloka omo ovanafikola ve hole okulongifa omambo.
Nghipondoka okwa ti ouministeli waye otau twikile okuyandjaneka eengulumambo koikandjohoololo ya yooloka shaashi oshiwana osha pumbwa omayakulo.
“Eengulumambo oda pumbiwa kovanafikola opo va kale tave li hongelemo unene tuu pefimbo lomakonakono noshoyo okulongifa eekompiuta okuninga omapekapeko oilongwa yavo,” ta ti.
Okwa weda po ta ti ovanafikola ve li pomudingonoko waHangwena ohava mona ouwa okupitila mongulumambo ei.
“Eengulumambo oda nunimwa oshiwana. Ovanhu nava talelepo eengulumambo okukonga omayakulo,” ta ti.
Okwa pandula ovanailonga tava longele keengulumambo lwokuyandja omayakulo koshiwana unene tuu eetundi dokompiuta.
Paife ngaha moshitukulwa shaHangwena omu na eengulumambo mbali oyo imwe ya tungwa kokOngo.
Ongulumambo yokOngo nayo oya tameka okuyandja omayakulo kovanyasha, nounona vofikola.
Otai ka patululwa pambelewa komesho yomafiku.
Omunyala Hangula Timoteus okwa ti ka kwa li ha dulu okulongifa okompiuta ashike paife oku na ounongo wokulongifa okompiuta molwashi okwa pewa eetundi.
“Otwa pandula epangelo eshi le tungila ongulumambo ei molwashi ohatu pewa omayakulo a yooloka,” ta ti.