Ngoloneya moshitukulwa shaMusati Erginus Endjala okwa ti eenhauki dOvangola da ngudumana pEtunda otadi dengwa kondjala eshi dihe na oikulya.
Endjala okwa ti ombelewa yaye oya lopotelwa eenhauki da kwatwa komanyutu, omanga dimwe oda kwatwa konghana ya etwa kekako nondjala.
Okwa didilikwa eenhauki dovAngola da dja pushiindalongo Angola de u ya moNamibia katameko lomudo, odo kwali tete deliyanena moitukulwa ivali Ohangwena nOmusati.
Eenhauki oda tau ka koshilongo shado molwoo oshikukuta eshi shili moAngola.
Endjala okwa hokolola ta ti omwaalu weenhauki paife u li po 3000, omo Ovaangola natango tava twikile nokumbolokotela moNamibia efiku keshe tava kongo ouxupilo.
“Oikulya paife i na wanena vali eenhauki shaashi omwaalu owa londa pombada naashi osha eta opo eenhauki di kale da kwatwa komanyutu shaashi kandina eshi tadi li vali,” Endjala ta ti. Okwa yelifa ta ti petameko oikulya okwa li ya wana shaashi eenhauki okwa li dili momwaalu munini, ashike paife oda ninga dihapu nai. “Ohandi indile oshiwana opo shi u ye momwaalu munene okuyambidida eenhauki dovAngola noikulya shaashi oshili momhumbwe yoikulya, noikutu,” Endjala ta ti.
Okwa ti ku keshe ou e na ehalo lokuyambidida Ovaangola nakwatafane nombelewa yaye yopashitukulwa ile a kwatafane nakansela woshikandjohoololo shaRuacana.
Okwa ti ounona vamwe veenhauki ova fya kondjala konima eshi kwa li vakwatwa komanyutu, omanga ounona vamwe ove li monghalo idjuu eshi tava vele omanyutu kondjala.
Okwa weda po ta ti ovakainhu vamwe ovakwatwa konghana va ninga oipute komavele, ihava dulu nokunyamifa ounona vavo.
“Ohandi kunghulile oshiwana opo shi kale shina ombili neenhauki, ndele ha ku ningila nande eenhauki ominyonena shaashi na do ovanhu ashike ngaashi ovanhu aveshe,” Endjala ta ti. Ngoloneya okwa ti okwa pandula unene ovanhu aveshe va yambidida eenhauki okudja petako eshi de u ya pEtunda.