Auleria Wakudumo
Ongudu yoIndependent Patriots for Change (IPC) otai fininike Elelo lodoolopa yaHelao Nafidi opo li yandje omatomheno kutya omolwashike la dimina ongudu imwe aike i lande ko eepala adishe dolusheno modoolopa nelalakano lukutula ko omapulakata eengudu dopapolitika.
IPC vati okwa li a pulwa a futile eepala 10 oN$2 230 Etitano la dja ko, ashike paife elelo lodoolopa ola hala oku va shunifila oshimaliwa shavo shaashi vati eepaala adishe modoolopa oda futilwa nale kuSwapo.
Hamushanaga wo-IPC Loide Hamutenya okwa ti Etivali vati ova mona onhumwafo okudja kelelo lodoolapa tai ti kutya itava dulu okutula omapulakata avo moHelao Nafidi shaashi eengudu dimwe vati oda futa tete kuvo.
Elelo lodoolopa ola fatulula mombapila kutya ola ninga epuko, nopo li ha endulule epuko la ningwa monakudiwa, otali ka tula po omilandu dipe dekwatafano mokushiivifila eengudu dopapolitika kombinga yetulepo lomapulakata.
Hamushanaga wongudu yo-IPC, Loide Hamutenya vati okwa ninga ekwatafano nombelewa yaHelao Nafidi omanga inava futa ndele ta lombwelwa a teelele ovanambelewa aveshe mombelewa yodoolopa ve likunde, nokonima okwa pewa enyamukulo kutya ongudu yavo otai dulu okufuta, opo va pewe epitikilo okutula omapulakata modoolopa, osho vati va ninga.
Omupopiliko wongudu yo-IPC koshitayi shokonooli, Eino Heelu okwa ti ova shiivifilwa kutya vati Swapo oye ashike a pewa epitikilo okutula omapulakata aye keepaala dolusheno modoolopa.
“Swapo okwa futila vati epaala adishe, onghene kape na ongudu imwe vali ya ufwa okutula omapulakata modoolopa yaHelao Nafidi,” Heelu ta ti.
Heelu okwa ti ongudu yavo itai ka tambula oshimaliwa osho. Okwa twikila ta ti okwa hala okuuda etomheno kutya omolwashike ongudu imwe oyo aike tai pewa epitikilo okutula omapulakata modoolopa aishe.
“Efimbo paife olokukonga omawi okuhoolola, onghene opaala imwe ngaashi sha kala hashi ningwa shito otai dulu okutulwa omapulakata nande eengudu mbali ile nhatu ngaashi sha kala hashi ningwa shito,” Heelu ta ti.
Mayola waHelao Nafidi, Darius Shaalukeni menghundafana naKundana okwa ti kutya ke na owino kombinga yombapila oyo ya dja mombelewa yaye. Okwa ti kutya ina lopotelwa oshinima osho. Odoolopa yaHelao Nafidi oya holola kutya eepaala adishe dolusheno vati oda futilwa nale, onghene itava ka pitika vali eengudu dimwe.