Omupedu minista wovakwashiwana ovo inava fikwa nawa keputuko Royal Kxao /Ui/O/Oo okwa ti ovakainhu vahapu, nounona voukadona ova ninga oihakanwa yokulongelwa ominyonena dopaixulo kovalumenhu.
Okwa ti ovakainhu ka ve li vali meameno la wana ngeenge ve li mokati kovalumenhu ile ngeenge tava ende oufiku shaashi ohava kala tava dengwa nokupewa omikifi kovalumenhu.
/Ui/O/Oo okwa ti oilonga yomahepeko tai longelwa ovakainhu kovalumengu otai fifa ohoni.
Edi omupedu-minista okwe di popya Etivali pefimbo lepatululo pambelewa lomutumba wovalumenhu u li mOngwediva omo ovalumenhu va sha dja koitukulwa ya yooloka va shakena opo va topolafane ouyelele nghee vena okuxulifa po oimbuluma yoludi olo.
Komutumba oku ota ka kundafanwa oipopiwa ya yooloka tai ka ningwa kovanhu ve na owino monima yopanghalafano notau kala ko fiyo Etine.Onghee ovalumenhu aveshe ova manguluka oku kala vaya momutumba.
/Ui/O/Oo okwa kumaida ovalumenhu opo va xulife po okulongela ovakainhu nounona voukadona ominyonena dopaixulo.
“Omutumba ou owa fimana kovalumenhu aveshe shaashi otau yandje ehongo nouyelele nghee omulumenhu e na oku li umbata onghee eshi otashi kelele opo ovalumenhu vaha kwatwe vali komhepo yokulongela ovakainhu ile ovalumenhu vakwao oimbuluma,” ta ti.
Okwa ti kexulilo lomutumba ou ovalumenhu otava kala va eta po e lunduluko noshoyo okukala va konga omikalo odo tadi vakwafele vaha longe va li oimbuluma.
“Omutumba ou otau yandje yoo vali eudeko kovalumenhu kombinga nghee sha nyika oshiponga ngeenge omukainhu a kwatwa onghonga,” ta ti.
Okwa weda po ta ti ovalumenhu nava kale va manguluka okupula omapulo pefimbo lomutumba ou opo va dje mo ve na eudeko lihapu nokukala vali va ka topolafana ouyelele na vakwao.
Moshipopiwa shaye mayola wodoopola yaNgwediva Taarah Shalyefu okwa kumaida ovalumenhu opo va kale alushe tava ka konga omakwafo kovaxungimwenyo ile kovafitaongalo ngeeenge ve li hanga ve li momaupyakadi a yooloka shaashi okulonga oshimbuluma ka shishi e kandule po lomukundu.
“Omitumba edi oda pumbiwa okukala hadi ningwa momikunda da yooloka opo ovakwashiwana va kale va pewa ouyelele nghee ve na oku li kaleka kokule nokulonga oimbuluma,” Shalyefu ta ti.
fhamalwa@nepc.com.na