Auleria Wakudumo
Minista wounamapya, omeva nomatalululo omadu Calle Schlettwein okwa holola ta ti eepelesenda tadi tengenekwa di li po91,5 domaumbo okomikunda oku na omeva mayela.
“Eshi otashi holola omwaalu wa ya pombada nexumokomesho moshiwana nonande tu na omashongo onghalo yomhepo haa lunduluka ngaashi oshikukuta osho hashi eta omeva a pwe mo meendama nomeva taa pate moshilongo, Schelletwein ta ti.
Eshi Schlettwein okwe shi holola pefimbo loshoongalele shititatu shomudo 2024/2025 mOvenduka.
Schlettwein okwa holola ta ti ouministeli owa longifa eeproyeka dihapu okutunga eepomba, eemboola, omandoloma omeva, omatale nosho tuu mokukandula po omhumbwe yomeva omudo 2024/2025.
Epangelo vati ola kala nokukandula po oule weedula daya unene koitukulwa yokoushai moshilongo notali twikile okukandula po omhumbwe yomeva moshilongo.
Minista okwa weda po ta ti epangelo ola tunga ominino domeva 22 moitukulwa ya yooloka, ominino dopaumwene 2 660, natango moitukulwa ya yooloka, epangelo ola mboola yo eemboola 136 omo 122 da patuluka notadi longifwa nale koshiwana.
Ouministeli vati owa tunga yo eenhele dokudinda omeva di li 238 natango moitukulwa ya yooloka yoshilongo.
Schlettwein okwa weda po ta ti ouministeli owe shi endifa nawa momatalululo omadu nowa pondola okuyandja eenhele dimwe vati kovakwashiwana ashike natango owa pumbwa okulonga noudiinini ngeenge tau tembula ovanhu osho yo okukwafela oshiwana ngeenge shi li peenhele odo.
“Ouministeli owa pondola okumona eefaalama mbali moitukulwa ivali, Omaheke noHardap konima yeenghundafana noovene veefaalama.
Eefalama adishe odi na eehekta 11 192.8065,” Schlettwein ta ti.
Eefaalama edi vati otadi ka kwafela okutulwa ovanhu ve li momhumbwe.
Schlettwein okwa yandja oshihopaenenwa shovanhu ve li momhumbwe ngaashi Ovanamibia va dja koBotwsana odula ya dja ko.
“Otwa pondola yo okuyandja edu kOva//khomanin moshitukulwa shaKhomas. Eshi otashi kwashilipaleke kutya Ova//khomanin paife ove na edu moshilongo shavo,” Schlettwein ta ti.
Schlettwein okwa holola yo ta ti ovanhu okudja koshitukulwa Omaheke, Hardap, Kunene, Kavango East, Otjozondjupa, nOhangwena ova tembulwa okuya kofaalama hai ifanwa Ombindi Karambi No.155 moKunene, Omkeer No.204 mOtjozondjupa, nOkouwater No.209 moHardap.
-wakudumoauleria@gmail.com