Auleria Wakudumo
Ombelewa yOmuprima oya kunghilila oshiwana opo shiha lye oufila woshikukuta wa ekelwashi.
Oshivike shadja ko ovakwashiwana vahapu mOtavi ova mbobolokela ketoto oku ka hakana oukutu voufila, ovo vali va ekelwa ketoto oko.
Meenghundafana naKundana, omupopiliko mombelewa yOmuprima Maxmus Halwoodi okwa holola ta ti oufila woshikukuta inau hangika wa pewa epangelo natango.
“Epangelo ngaashi sha kala omukalondjiikilile ohali yandje eetendela komahangano opaumwene moshilongo opo a nduluke oikulya yoshikukuta ngaashi oufila. Oukutu voufila ava, ova hangika momake ehangano loNamib Mills olo la enekelelwa okulonga oufila woshikukuta,” Halwoodi ta ti. Halwoodi okwa yelifa ta ti oshikukuta opo kwa li tashi twalwa kepangelo okudja koNamib Mills opo shi topolelwe nawa oikandjohololo nokupewa ovakwashiwana ava va shangifwa.
Sha dja eshi oshitukulwa shaTjozondjupa sha lokwa odula ya kula mexuliloshivike, oukutu voufila 34 vati ova lokwa konongo manga va tuvikilwa moNamib Mills.
“Ehangano ola landula omulandu wouminsteli wouhaku opo li ekeleshi oikulya ei shaashi kaili monghalo yokuliwa kovanhu,” Halwoodi ta ti.
Molwaashi oikulya kayali momake epangelo, itali ka futa oshimaliwa shasha molwa oikulya oyo ya ninga nai eshi ya lokwa. Ombelewa yomuprima oya weda po kutya ohai mono oshikukuta okudja komahangano a yooloka oo elishangifa noNamibia Agronomics Board nokwa hanga oipumbiwa ya tulwa po kouhaku.
“Omahangano taa yandje oikulya yoshikukuta kepangelo okwa pumbwa okukwashilipaleka kutya oikulya tai yandjwa oi li monghalo iwa yokuliwa kovanhu,” Halwoodi ta ti.
Halwoodi okwa ti oikulya ya ninga nai otai dulu okukala ina oudiyo sho osho itai pewa ovakwashiwana.
Onamib Mills nonande ya kanifa oushako voufila ava, oyo imwe yomomahangano a kala melongelo kumwe nombelewa yomuprima okuyambidida epangelo okuyandja oushako voshikukuta eedula needula.
Mouvidio va andjakana komalungula, ovakwashiwana ova holola eudo nai eshi vati oikulya tai hepa manga tavafi odjala komaumbo.
Ovakwashiwana vamwe ota tondokela ketoto opo veke li hakane oikulya oyo ya tutilwa komaloli ketoto.
Mouvidio, oufila otau ulike wa ninga omakuma komeva odula nauhapu owa ninga nai. Ovakwashiwana ova kumaidwa opo vaha kufe po oukutu voufila ovo, naavo va kufa po nale otava indilwa opo vahalye oufila oo.
Ombelewa yomuprima oya holola kutya oshikukuta otashi ka twikila okupewa ovakwashiwana okudja mo30 Juni 2025 okupitila moikandjohololo ngaashi hashi ningwa shito.