Auleria Wakudumo
Eefikola di na eendodo dopedu di li popepi netoto mOpuwo vati oda taalela oupyakadi wovahongwa hava faula ofikola opo va ka sheenene omaloli okudipa oikulya, noilongifomwa imwe ketoto.
Vati ovanafikola vahapu novadali vavo ova tula elandulafano letoto momitwe, ve shi nawa kutya omafiku elipipo eefitola dakula doikulya hadi ka dipa oyeekelwashi ketoto.
Momafiku eefitola odo ovadali vati navo vene ohava keelele ounona vavo keetundi ongula opo va ka nyange ketoto. Omafiku oo, ounona meefikola ohava kala mo tava valwa.
Vamwe vomovahongifikola keefikola oko ova ti onghalo yoluhepo omo hamu di ounona oyo ya etela ounona va kale va tula etoto komesho yofikola.
Okuhada momatoto kuvo oshiima shi li mondjila paife, molwoluhepo lamemememe komaumbo avo. Ovakwashiwana vomomudingonoko waPuwo tava ti nande okaana oka kala ka hala okuya kofikola ovakulunhu ovo have va keelele ko, vo va ye navo ketoto va ka nyange oikulya noipumbiwa imwe ya kwatela mo yokudika nokufitika omaumbo.
Ovadali vamwe vati inava hala oku ka hada metoto voo vene, onghene ohava tumu ko ounona.
Omukulunhufikola pofikola Katutura Project School mOpuwo okwa ti shaashi ofikola kai na omuhandjo, ohashi kala shidjuu okutonatela omalinyengo ounona shaashi oven li metonatelo lovadali, voo ovadali ovo hava longifa ounona oku ya ketoto.
Katutura Project School oyo ya shaama netoto nayo oi na eetundi dongula nadimwe domutenya.
“Ounona vahapu have uya keetundi domutenya ovo hava kala ve li ketoto efimbo longula oshoyo vahapu ovo have ya keetundi dongula hava xulile petoto ponhele yokuya kofikola,” Ndumbu ta ti.
“Onda kufa omulongi woLife Skills opo ndi ka tale ame mwene kutya omolwashike naanaa ounona tava xuulile petoto, ashike eshi nda ka mona apa hava di onda kumwa,” Ndumba ta ti.
Okwa ti vati okwa popya novakulunhu vounona ashike ova nyamukula kutya kape na eshi tava dulu okuninga molwonghalo yoluhepo omo ve li.
Ovakulunhu ova ti vati kave na oikulya komaumbo.
Ounona vati ihava pwilikine nokulitula mo motundi shaashi ova fya ondjala.
Katutura Project School oya mona vati ekwafo okudja kepangelo opo i kale hai telekele ounona etete kofikola. Nande ongaho omukulunhufikola okwa ti ita ti ounona ihava i vali ketoto shaashi natango vamwe oko hava xuulile tava kongo kutya nee oikutu, oikulya ile oitenda noinima ya wedwa po va ka landife.
“Ofikola oya ti ohai pate omuvelo alushe opo va keelele ounona ovo ve ya kofikola vehe livake mo va ye ketoto.
Ngeenge okwe ya kofikola, opuwo ke na vali omhito yokuya ketoto,” Ndumbu ta ti.