Auleria Wakudumo 

Ovanailonga voikondo yepangelo ya yooloka oveli kufa eengonyoto momaulu eshi va kufa ombinga mokutondoka nokuenda, okudana etanga lokeenyala,okunhuka moshako nomaudano amwe ma shambula Etitano. 

Oudano owa unganekwa kombelewa yelelo loshitukulwa shaShana. 

Ovanhu ova hovela okutondoka okudja pokapale komaudano koIndependence Stadium mOshakati, tava ende va lambalala opate yaKatana fiyo tava alukile pokapale komaudano natango. 

Oudano okwa li wa nhuninwa okueta kumwe ovanailonga voikondoyepangelo ya yolooka, oukolele wovanailonga palutu nopamadiladilo, okukwatafana pokati kavo nokupanga oukaume.

Omaudano okwa kwatela mo yoo omaudano otumbutumbu oshoyo okundana pamufyuululwakalo. Linea Nghishoono, umwe womovakufimbinga okwa holola kutya okwa uda nawa eshi a kufa ombinga momaudano. 

Okwa ti molwaashi ovanailonga ohava kala veli pyakidila noilonga meembelewa oule woshivike ashishe, eshi oshinima shiwa okuningwa keshe kodula ile komwedi ngeenge otashi dulika opo ku kalekwe po oukolele wovanailonga.

“Onda panga oukaume novanhu vahapu okudja koikondo ya yooloka. Eshi osho nda kala nda hala alushe,” ta holola ngaho. Naftal Nghishoono, naye umwe womovakufimbinga okwa holola kutya okuhole okuninga omadewo nokutondoka okwe mu kufa momutumba opo euye okuwaimina ovanailonga pamwe naye okudja koikondo ya yooloka.  Okwa ti oku udite a pepelelwa mokukufa ombinga metondoko eli. 

“Ngaashi sha uka kexuulilo lomudo ngaha, vahapu ohatu kala twa sholola notwa shuna pedu moilonga yetu. Eshi oshili omhito iwa, opo tu xulife oilonga yetu yokomudo nondjungu fyee tu hange omalalakano etu okodula,” Nghishoono ta holola ngaho. -wakudumoauleria@gmail.com