ONGWEDIVA – Okwa lopotwa eefikola 15 da pata shaashi di li koshi yomeva koshitukulwa shaHangwena, Oshana nOmusati.
Kansela woshikandjohoolo shaKalongo Laurentius Iipinge okwa koleka ta ti oshikandjohoolo shaye oku na omeva efundja taa kunguluka okudilila moAngola.
“Omaumbo noikunomwa momapya oku li koshi yomeva. Ombelewa yange oye lipyakidila nokuninga omalongekido okutwala ovanhu konhele imwepo,” ta ti.
Omukulunhuwiliki wehongo moshitukulwa shaMusati Paulus Kashiimbi okwa koleka ta ti moshitukulwa shaye omwa pata eefikola 11 molwonghalo yomeva.
Eefikola domOmusati odo Oukwandongo Combined, Okakekete Primary, Oshiputu Combined, Ondeitotela Combined, Embimba Combined, Mupolo Primary, Elao Primary, Naiti Primary, Ondombeyohumba Combined, Oshatotwa Combined, nosho yo Oshaaluwata Combined.
Okwa weda po ta ti eefikola ngaashi Onkambadhala Combined nOneheke Combined, Ekundu Combined ovanafikola ashike ve li meendodo dopetameko ve li komaumbo. Kashiimbi okwa yelifa ta ti ovanafikola hava fikola keefikola da pata itava ka ya mefudo molwaashi ova pumbwa okuhongwa nokufutila po efimbo olo ve li komaumbo.
“Ovahongifikola navo ove li manga komaumbo molwaashi itava dulu okukala kofikola ku na omeva a talama,” ta ti.
Okwa ti keefikola dimwe ovanafikola ashike ve li mondodo onhi-9 nonhi-10 hava i keetundi molwaashi otava dulu okutauluka omeva.
Omukulunhuwiliki wehongo moshitukulwa shaHangwena Isak Hamatwi okwa weda po ta ti eefikola Oshingunguma Primary, Ndapona Yashikende Primary nosho yo Onghala Combined oda pata. Hamatwi okwa ti mopaife ngaha ovanafikola novahongifikola ove li komaumbo va teelela omeva a pwiinine.
“Ovanafikola kofikola Uudjombala Junior ohava di meetenda di li mofikola molwaashi eendjila odo hava ende odi li koshi yomeva,” ta ti.
Hamatwi okwa ti omeva okwa nyika oshiponga shaashi ota dulu okudipaa ovanafikola.
“’Otwa pata eefikola molwashi ina tu hala okuuda omunafikola a xulifila momeva,” ta ti.
Hamatwi okwa kumaida ovanafikola opo vangungumane ve li komaumbo fiyo onghalo ya tya po xwe po.
“Ovadali nava popye nounona opo vaha danene momeva ngeenge tava lifa,” ta ti.
Omukulunhuwiliki wehongo moshitukulwa shaShana Pauline Shapumba okwa koleka ta ti eefikola ngaashi Engombe Primary nOmpandakani Combined oda pata.
Okwa ti ombelewa yaye otai ka kwashipaleka kutya ovanafikola ve li komaumbo molwonghalo yomeva otava ka hongwa nelalakano lokukelela hava kale konima yoinyangadalwa yavo.