WINDHOEK Uuministeli wEgameno nEpopilo lyoshigwana otau ka thitika oombululu adhihe dhi li po ngashingeyi dhoka hadhi longithwa nayi kaanandholongo melongelokumwe naatalelipo yawo mboka ya kala nokushipondola okuyakela iingangamithi, oombele oshowo iilongitho yilwe inayi pitikwa moondholongo, naashika oya kala nokushininga nando pomiyelo ope na aatonateli yondholongo. Iinima ayihe mbyoka tayi ningi hayi etelwa aanandholongo otayi ka kala hayi konakonwa nuukeka, naashika osha holoka konima sho she ya puuyelele kutya iinima yontumba oya kala nokulongithwa okuholeka nokupititha oombele, uusindo wiitenda, omapangwe, ooselula oshowo iikwawo yi indikwa. Enyatipaleko lyegameno moondholongo otali ka kwatela mo omahala agehe gezulonkalo lyoonkwatwa. Poshigongi shiikundaneki metitatu, Minista gwEgameno nEpopilo lyoshigwana, Peter Tsheehama okwa holola eyemato lye shi nasha niilwitho ya nika oshiponga oshowo iingangamithi mokati kaanandholongo momahala ngaka moshilongo. Paye, Tsheehama ota ti iinima ayihe mbyoka oyi li omandhindhiliko gonkalo yoshiponga nokwaanegameno kaanandholongo yakwawo oshowo aaniilonga, onkee itayi ka idhidhimikilwa we nando nando. Poshigongi shiikundaneki, aanambelewa yondholongo oya ulike iilwitho mbyoka ya hambulwa kaanandholongo ngaashi oombele dha longwa muusindo wiitenda oshowo iingangamithi mbyoka ya yugwa koonkwatwa naakaulinyanga okuza muDesemba 2005 sigo May nuumvo. Iinima yilwe ongaashi uusaaha, iilwitho ya honga, omakende ga tatulwa, oombiga dhokuhilitha omapangwe, ooselula, oongwiya dhokuhondjitha, omashina goongeleinela, uumbi wokutanditha miipangelo, iikonde, oosikulufundalaye, nosho tuu. Tsheehama ota ti omahadho gesiku kaapolisi naanambelewa yondholongo mOndholongo Onene yaVenduka, oshowo iitaasi yopolisi poKatutura noWanaheda oga eta puuyelele onkalo yi nyanyaleka yelongitho lyiingangamithi neyakelo lyiilwitho yoshiponga moondholongo. “Ondumba yiingangamithi, ooselula niilwitho ya nika oshiponga oya yugwa ko kaapolisi naanambelewa yondholongo konima sho ya yakelwa momahala ngaka. Otwa kwata ko iinima mbyoka inayi pitikwa yi li 270 muule woomwedhi 29,” Tsheehama ta ti. Oyindji yomiinima ohayi yakelwa mondholongo melongelokumwe naanakwashigwana nenge aanambelewa yondholongo naapolisi aadhudhu mboka haya longele kumwe noobotsotso, nenge ya yakelwa mo kaanandholongo yoyene. Shoka tashi limbililike unene osho shoka kutya omahala goondholongo moshilongo oga tothwa mo kaalongi yiimbuluma oshowo aalandithi yiingangamithi ongomalandithilo dhingi giingangamithi oshowo iilonga yuubotsotso. Omanga nee iingangamithi yimwe ngaashi omapangwe haga yakelwa moondholongo koonkwatwa, aakwashigwana yamwe oshowo aanambelewa naapolisi aadhudhu, omikalo dhilwe ohadhi longithwa pakulongitha ooselula, onkalo ndjoka ya nika oshiponga kegameno. “Aalandithi yiingangamithi mboka ya simana oyo oonkwatwa dhoka hadhi tulwa muundunda wokutegelela omatamaneko piitaasi yondholongo oshowo moondholongo mboka ya pangulilwa nale shi nasha nokulanditha iingangamithi. Yamwe yomaanandholongo oye na omakwatathano ga kola naalongi yiikulumuna mboka ye li pondje mboka haya pititha nokuyakela mo iinima mbyoka moondholongo oshowo uundunda wopolisi,” Minista ta ti. Mokuulikila aatoolinkundana omiyalu ominene dhiilwitho ya yalekwa poshitaafula, aanambelewa yondholongo nopolisi otaya ti iingangamithi ngaashi omapangwe, oombele niikondjitho yilwe ya nika oshiponga ohayi yakelwa moondholongo koonkwatwa ya holekwa momatako nohayi vulu ashike okumonika komashina gokuminikila molutu – ano X-rays. “Aanandholongo oye na omikalo odhindji okuholeka nokupititha iinima mbyoka. Ohaya vulu okuhoka ombululu mothewa nokuholeka mo ombele, nenge okuholeka muuplastika womiti dhokwiipukusha komayego. Ooselula nomapangwe ohaga holekwa momatako nokuyakelwa mondholongo pamukalo nguka,” Omukuluntu gOndholongo onene mOvenduka, Ismael Kamati ta ti. Iilongitho yomookombitha ngaashi uusindo ohau hongwa kaanandholongo noonkwatwe nokuningwa iilwitho ya nika oshiponga uuna taya kambadhala okwiiyaka mondholongo nenge okuponokela aanambelewa yegameno. Omikalo dhimwe hadhi longithwa okuumbila molugumbo lwondholongo iinima mbyoka ngaashi uupakete womapangwe noku yi topolelathana mokati kawo. Uupakete wepangwe wongushu N$2 334 owa adhikile mondholongo pokati kaJanuali sigo Mai nuumvo mOndholongo onene yaVenduka. “Uupakete mboka wepangwe ohau tulwa muupakete uushona wu thike pomunwe ngoka omunene nohau landithwa N$20 kamwe meni lyondholongo. Omunandholongo gumwe otwe mu adha niimaliwa iikukutu (N$8) nepangwe monufu ye,” Kamati ta yelitha. Omuyalu gooselula 62 okwa li wo gwa yugwa ko muule woomvula mbali. “Ooselula ohadhi longithwa unene ongomikalo dhuuhupilo, onzo yiiyemo, nokulongekitha iikulumuna naantu mboka ye li pondje nenge okudhengela yakwawo ya longithe oohauto uuna tayi iyaka moondholongo. Oku shi talela megameno ooselula odha nika oshiponga,” Kamati ta ti. Kakele komikalo dhoka hadhi longithwa, aanambelewa yopolisi naagameni yondholongo otaya tsikile okushilipaleka etulomiilonga lyomikalo dhoka dhi li po okukwata moshipala iikuluma mbyoka. Shika osha kwatela mo omahadho ga kwata miiti kaantu oohandimwe, aatalelipo, aanambelewa, oonkwatwa naanandholongo yoyene. Tsheehama okwa londodha mboka taya ka monika ondjo mushika kutya nee aakwashigwana nenge aanambelewa kutya ngele oya kwatwa nayo otaya ka tulwa mokakuma.