Katima Mulilo- konyima tupu zoyivike kutunda tupu apa mundiro kaguzonagwire mberewa zondango zodoropa omu ava tura yimbapira yawo nayinye ntani mberewa zokutulisapo magano pamberewa, ndango kavatokwere asi vahepa kuyitura moyiryugana yomarongikido. Yirugana nayinye kayitamekere nkera kevango nye lyepe eli vana tura lyokukwateramo kurukanda Wooden Bridge, kutunda tupu komundiro ogu gwahorokere mwaOctober.
Muhuyungilipo ndango zodoropa kayinkondopekere asi asi novatungimo vana vadivisa nare kukwama ntumwa raka zawo ezi kazipwege moutano, nokutanta asi ediruko eli kwaliretesapo mokutura asi yirugana yize mouta wakora omo vana kuyimona asi vahepa kutara asi ngapi navatunda moudigu wangesi. ‘’ Age kuna kutanta asi mundiro kwazonagura mberewa zetu zokukona kona makuli, eyi yatuninkisa asi tuhageke posiruwo sosisupi yirugana yetu’’, Muyoba yimo ana kufaturura ngoso. ‘’ Ose kuna kutantera nye vantu ndi vatungimo asi ose tuna tameke nosirugana setu koruha rwa Wooden Bridge. Ose kuna kufa unene omu katumwene asi vatungimo kavakere nomukaro gomuwa mokundindira mosiruwo esi katukere naso sosidigu. Vatungimo ngesi kuvhuara nye vagwane sirugana moomu vasiharera nomu twasigazarere, muna hamene egano twaromo lyomatungo, kuruganesa evhu, nanayinye eyi ono hara kugwana komberewa. Mundiro nye ogu gwaOctober, kuna retesapo matamayi. Siruwo nye sosigongi sonkarapamwe sivike sina puko, ministera gonodoropa nekuliko nomukunda, James Sankwasa, katente asi mundiro ogu kuvhura gukare asi vantu woowo ava ruganamo yiwo vana guretesapo, eyi kuna kara asi kwayirugana negano asi vazonagwise kugwana umbangi ou una kara monomberewa odo. Mbudi zangoso kunakara nye asi kuna kulihanena modoropa nazinye, nampili ngoso yina kara asi kwato simpe yitundwamo yomakona kono vana pwagesa.
Nampili ngomu yina kara nye ngoso, ndango azo kuna kutanta asi vana lituramo ntani tava gava sirugana moomu sawapera. ‘’ Vatungimo vetu, kugava sirugana hawe ose taturugana moomu yawapera.’’ Muyoba ana kutanta ngoso. ‘’ Ose tatutwikire kurugana ngorooro ngoso, vatungimo tavagwana mbatero moomu ava zigwana pwanare, pwahana mazonagwiso nampili gonkandi, nampili moomu twakere asi kwadiruka hawe kapi yazonagwisire sirugana setu. –anakale@nepc.com.na