WINDHOEK – Egumbo lyopashigwna osho wo ehangano lyoshiketha shuunona lyIigwanahangana (Unicef) mEtiyali oya shaina euvathanotsokumwe ndyoka tali lalakanene okundondopeka uunongo waatotiveta moshilongo. Shika osha li sha tseyithwa komunashipundi gwolaata yegumbo lyopashigwana Margaret Mensah Williams momutumba. Ta popi pethimbo lyeshaino, Mensah-Williams okwa ti uukuume mbuka, Egumbo lyopashigwana otali ka nkondopeka omatalululo gooveta dhawo ngoka taga ka pa okanona okaNamibia egameno.
“Ondi uvite nawa sho euvathanotsokumwe ndika tali ka kala li na oomvula dha pita po puntano. Otashi ka kwathela oongundu adhihe mbali dhi ka tale iinima yontumba muule opo ku monike nkene omaupyakadhi taga kandulwa po,” ta ti ngaaka.
Mensah-Williams ta kwashilipaleke Unicef kutya euvathanotsokumwe ndika otali ka tulwa miilonga. Omukalelipo gwaUnicef moNamibia Rachel Odede okwa ti euvathanotsokumwe ndika otali lalakanene okuyambula po nokunkondopeka uunongo waatotiveta opo ya kwathele Unicef a mone iizemo ya kola notayi kalelele.
Odede ta ti okunkondopeka uunongo waatotiveta otaku ka kwathela Unicef a adhe iizemo ngele tashi ya kaanonoa miimpungu ya pamba elongo, uundjolowele, egameno, HIV/AIDS,iikulya, omeya nosho tuu.
“Onga egumbo lyotango lyokupititha ooveta, otu shi kutya oolaata dhomagumbo gopashigwana muuyuni awuhe odhi na oonkondo dhoku eta omalunduluko monkalo yaanona. Otadhi vulu okugandja iikwa niipangitho, okuya po nomilandu dha kola, osho woo oku ya po nooveta tadhi gamene aanona,” ta ti ngaaka.
Ta gwedha po ishewe kutya etsokumweuvathano ndika olya longwa pamukalo ngoka tagu longo pamwe nonkalo yomoshilongo, ta ti otagu ka longitha omikalo dhi ili nodhi ili. Euvathano ndika otali ka longela ontega noNational Development Plan, Harambee Prosperity Plan osho wo oAgenda 2063.
(NAMPA)