Auleria Wakudumo
Otashi dulika omuvalu wovanafikola ovo ehongo lavo la piyaanekwa kefundja nokodula tau lihekele po40 000 ile udule po.
Eshi oshe likolelela komivalu odo da yandjwa komalelo opaitukulwa atatu monooli, omo eefikola adishe kumwe di li 78 da pata pakafimbo molwoyana oyo i hadi omeva neenghono.
Omivalu edi otadi ulike kutya ounona vomoshitukulwa shaMusati noshaHangwena ovo ehongo lavo la piyaanekwa ove li aveshe kumwe 33 231 inamu kwatelwa vomOshana ovo omuvalu davo inadi yandjwa natango.
Eefikola dimwe di li koshi yomeva nadikwao oda dingililwa komeva efudja nounona kave na nghene tava fiki pofikola.
Oshitukulwa shaHangwena osha didilika ovahongwa ve dule 7 221 va kumwa koshikumungu shefudja.
Omunashipundi welelo loshitukulwa shaHangwena Erickson Ndawanifwa okwa holola ta ti eefikola da fika po302 oda kumwa koshikumungu shomeva efudja moshitukulwa shavo.
Momuvalu omo, eefikola 25 odo da kumwa unene koshikumungu shomeva omanga 16 da pata filufilu, eefikola hamano oda kaleka manga eetundi dovahongwa veendodo dinini, ondodo 0 fiyo ondodo oninhatu nofikola imwe i na ovahongwa hava di pofikola.
“Osekundefikola Udjombala moshikandjo shaHangwena oya tokola opo ovahongwa va kale hava di pofikola molwomeva. Etokolo eli ola ningwa opo ovahongwa veendodo dopombada vaha fyaale po moilongwa yavo shaashi ohava shange ekonakono lopombada,” Ndawanifwa ta ti.
Ndawanifwa okwa weda po kutya ova teelela eefikola nhano nando di tameke omuhandjo wopokafimbo omo ovahongwa tava kala tava di pofikola shaashi omeva a ninga mahapu momudingonoko.
Kakele kokudja pofikola, Ndawanifwa okwa ti yo eefikola dimwe oda shunifa komesho ovili yokuya kofikola shaashi ovahongwa vamwe ohava ende oinano ile, tava kunduluka omeva. Eshi osha ningwa yo shaashi okuenda momeva ohaku kwata efimbo.
“Vamwe paife ohava tameke po 09h00 ile po09h40 opo va teelele ovahongwa tava kunduluka omeva. Eshi osha tokolwa yo kwa talika eameno lovahongwa okuenda momeva ongula ya kula,” Ndawanifwa ta ti.
Ndawanifwa okwa ti eefikola dimwe unene odo da tameka nomuhandjo wopokafimbo, oda hovela nale eetundi dOlomakaya opo va tile po omafiku oo ovahongwa va kala ihave ya kofikola.
Omunashipundi welelo loshitukulwa shaShana, Andreas Uutoni okwa holola kutya eefikola 24 moshitukulwa shaShana oda kumwa koshikumungu shomeva.
Meefikola odo, eefikola 24 oda pata, eefikola omuwoi oda kaleka eetundi deendodo dopedu okudja mondodo 0 fiyo ondodo onhinhatu.
“Eefikola da kumwa unene koshikumungu eshi eefikola domoshikandjo shUuvudhiya, Ompundja, Ongwediva, Ondangwa Urban nOndangwa Rural,” Uutoni ta ti.
Omunashipundi welelo loshitukulwa shaMusati, Andreas Shintama okwa holola kutya eefikola 60 oda kumwa koshikumungu shomeva.
Ovahongwa 26 010 ova kumwa koshinima eshi pamwe novahongi 907.
Meefikola edi, eefikola 47 oda pata komeva, 3 oda kaleka eetundi dovahongwa vopedu (0-3), omanga hamano inadi pata ashike nado oda kumwa koshinima eshi.
“Eefikola da kumwa koshikumungu shomeva dihapu oda dja moshikandjo shOutapi, Anamulenge, Okalongo, Elim nOshikuku,” Shintama ta ti.
Shintama okwa holola yo kutya ope na eefikola hamano inadi pata ashike nado oda kumwa koshikumungu shomeva.
“Eengulu dofikola hamano, nhatu dokofikola Onaanda Combined School nanhatu dokUutsima Combined School oda hanaunwa po filufilu komeva osho yo komhepo yodula,” Shintama ta ti.
Oshitukulwa shaMusati otashi indile ekwafo okudika eetenda peefikola opo ovahongwa va kale hava di opo osho yo oumbautu yovahongwa novahongi.
Minista wehongo, omaungoba nomaudano Sanet Steenkamp okwa holola ta ti ouministeli owa didilika kutya omwaalu weefikola novahongwa va kumwa koshiningwanima shefundja otau londo efiku nefiku.
Steenkamp okwa ti ouministeli owa tuma ovanambelewa koitukulwa ya yooloka opo va ninge omapekapeko.
“Ouministeli itau dulu okuholola kutya omafiku oo ovahongwa va kala ihava i kofikola otaa ka ningwa ngahelipi pamhito ei. Oitukulwa keshe oi na oudjuu wa yooloka nakeshe oshitukulwa osha teelelwa shi ninge omatokolo she likolelela keemhumbwe dovahongwa vavo,” Steenkamp ta ti.
Steenkamp okwa indila ovahongi va tule eameno lovahongwa komesho.
“Osha fimana okukaleka po eameno lovahongwa shi dulife eshi tava ende momeva nokukanifa eemwenyo davo,” Steenkamp ta ti.