OKANGHUDI – Omupresidente omutivali waNamibia Hifikepunye Pohamba okwa kumaida ovadali opo va tume ounona vavo kofikola unene tuu oshiwana shovayelele nomuhoko wOvahimba.
Edi Pohamba okwe di popya Etivali pefimbo Kundana a talela po eumbo laye komukunda wavo Okanghudi moshitukulwa shaHangwena.
Pohamba okwa popya e likwetelela ta ti Omukokolipresidente Sam Nujoma okwa li a fimaneka ehongo.
“Nujoma okwa kala alushe ta ti okwa hala okaana keshe Okanamibia ka ye kofikola,” ta ti.
Okwa yelifa ta ti ope na omihoko dimwe da fimaneka omifyuululwakalo neenghulunghedi davo okungabeka ounona va tumwe kofikola.
Okwa ti Namibia paife ota ende ta xumu komesho ashike osha fimana opo ounona va tumwe keefikola ve lihonge nokuninga ovanashilonga vokomongula.
“Namibia okwa pumbwa ovanhu va hongwa. Osha fimana ngeenge ounona tava pewa ehongo lopetameko,” ta ti.