Onathinge – Vekoro lyanakufa Gerhard Semoen gonomvhura 69, ogu kakere asi kumwe nomunwendi namutekurwendi kavafire mehudi, nye ngesi kuna kara noudigu asi ngapi navahoreka vana kufa ava.
Awo kuna kusikimo magano gepangero nonoveta, edi dina kusilika asi kwato mapongo govantu vana kuponga kupitakana vantu murongo posiruwo simwe morwa tavalikagwisako mukiski ogu goCorona virus. Ano ngesi vanekoro simpe kapi vana tura etokoro asi tavahoreke momapeu ndi mosondaha. Morwa awo kuna kuyimona asi kapi nye nayiliza nomatokoro ogo gana karapo omu yina kara asi kuna kusilika vanekoro ntani vakwami vawo asi vahapongo mounzi wawo vakahoreke ava vanavasigi.
Morwa yangoso, nye awo nawo kavatente asi vanadiva kambumburu aka koCovid-19 omu vana kuyitanta nonoveta daso vana ditura moyirugana edi vana kara asi vana dizuvhu ntani yido nawo vana kukwama.
Eyi kuyimonenena apa murugani gwaNew Era kakadingwire evango eli vana pongo poNathinge moutatu, omu vana kara neyi yokulipoperesa kouvera ou pevero ntani monda zembo ntani awo kuna kuruganesa kanano vana turapo asi vantu ngapi nomulikara namukweni. Apa nye kazizuvhikire mbudi sinzi sekero novatungi kavawizire membo lyovanakufa ava omu kavayageve ruguwo rwawo.
Eyi yina kumoneka asi nare udigu mokusikisamo veta ndi asi ngendeseso zangoso. Kapi tovhuru kusilika muntu nkenye mokuwiza membo. Udigu wetu nowoma kuna kara nye unene pezuva lyehoreko, kuna kuyimona asi vantu wovanzi navawiza eyi yina kara nare asi kuna kulirwanesa nonongendeseso edi dina karapo.
Nye kapi yina kara hena momawoko getu, yimo ana kutanta gumwe kakerepo mukurona Frieda Uushona. Ehudi eli kalihorokere pokatji Okahandja 35 km naOtjiwarongo moune una puko, poopo sihauto kavagenderere kasilimbwede mutwe nomutwe nokumbi.
Vna kufa kuna kara munwendi Albertina Simeon gonomvhura 27, ntani mutekurwendi Erassy Ihinda gonomvhura 4, naHelena Shivute gonomvhura 8.
Musingi gokumbi kavamudimbwilire asi yige Junias Nande gonomvhura 32, ano ogu nye kakere asi gelike kaparukire mutekurwa Simeon simpe ngesi kuna kukondja neparu lyendi moICU. Owo vantu ava vakara asi ekoro lyawo vanzi, eyi yina kuninkisa asi navenye ekoro kuna hara kuyakara pehoreko lyovanakufa ava,ngapi nye omu noyirugana pakare asi ntudi vantu murongo tupu.
Yimo ana kupura ngoso Uushona. Hompa govandonga Fillemon Shuumbwa Nangolo kakadingwire vafisa ava, moutatu, omu kakavahundilire asi ngovanekoro vahepa kukara nomukumo.
Vahepa kuyitura nayinye eyi momawoko gaHompa Karung. Ose twahepa kukanderera, tukare nomukumo ntani twahepa kuyitambura asi yina horoka,yimo ana kuvakorangeda ngoso.