Ehangano lyoEnvironmental Investment of Namibia olya gandja olya gandja omayambidhidho gi ili nogi ili koprojeka yoshigwana yedhina Okongo Community Forest moshitopolwa Ohangwena mEtiyali. Omayambidhidho ngaka oga kwatela mo omboola, otenga yomeya osho wo yilwe.
Oprojeka ndjika otayi vulu oku ka lundulula oonkalamwenyo okupitila melikolo lyoshimaliwa, onkene tayi ka kwandjangela nokulwitha ondjala, oluhepo nonkalo yokwaa na iilonga. Okongo Community Forest oya li ya totwa momumvo 1997, ashike o-EIF oya li ya wayimine oku yi yambidhidha muAguste 2019 sigo Aguste 2021 noshimaliwa sha thika poomiliona N$3. EIF ehangano lyi na oshinakugwanithwa okuyambidhidha ooprojeka nooprograma ndhoka tadhi hwahwameke ehumokomeho tali kala po, noyo hayi yambidhidha unene uunamapya osho wo omahangano taga ungaunga nelunduluko lyonkalo yombepo muAfrica. Otali lalakanene okukale thimba meyambulepo osho wo eyambidhidho pashimaliwa opo lyi yambidhidhe ehumokomeho tali kalekwa po, osho wo ehumokomeho lyaa na ondjoolola mokati kAanamibia ayehe.
Sha ikwatelela kuLot Ndamanomhata, omupopiliko gwo-EIF, oprojeka ndjika unene oya tala kiimpungu ngaashi uunamapya wiilikolomwa yomwepya, uuniimuna osho wo okugongela iilikolomwa yomomakuti mbyoka kaayi shi omiti. Ta ti oprojeka ndjika yomomudhingoloko otayi lalakanene okunkondopeka omatamununo giilyo mbyoka ya taalelwa komashongo gelunduluko lyonkalombepo.
Okongo Community Forest oya kundikidha oohekita 55 918 moshitopolwahogololo shaHangwena. Aakalimo unene momudhingoloko gwOkongo ohaya ipalutha niikunomwa yomepya, uusita wiimuna osho wo okugongela iilikolomwa momakuti mbyoka yaa shi omiti,” ta ti ngaaka.
Ta ningi omuthindilomo kutya omimvo twa zi, omvula oya kala tayi loko okanamundonda, onkene kwa kala nokuholoka oluteni ndoka lwa gumu okukalamwenyo kwaantu. Onkene oprojeka otayi lalakanene okunkondopeka aakalimo pamikalo dhi ili opo ya sinde omashongo gelunduluko lyonkalo yombepo. Momushangwa gwe, ominista yomindhingoloko, Omakuti nomalweendondjila Pohamba Shifeta okwa kumike aakalimo yomomundhingoloko gwOkongo, unene aagundjuka, opo ya kaleke po eyambidhidhoholokopo ndika noya lundulule oonkalamwenyo dhawo opo ku keelelwe omwaalu gwaagundjuka oyendji mboka haya mbombolokele koondoolopa nelalakano lyokukapekaapeka onkalo ohwepo, ashike paushili, elundululonkalo lyomuushayi olyo onkalamwenyo yi li hwepo. Shifeta ta ti Okongo Community Forest oyi na ompito yokugandja iilonga oyindji okupitila muunamapya, osho wo oongeshefa dhilwe ngaashi okutekula oonyushi niinamwenyo yilwe.
“Otwa thikama twa itula mo ngele tashi ya kegwanithepo lyiilalakanenwa yetu ngaashi okukutha aantu moshigandhi sholuhepo nokupula komeho naashoka oshiwanawa. Shika otashi ka etwa komayambulepo giitopolwa yokuushayi, osho wo e etepo lyiilonga mokati kaanyasha opo ku kandulepo oluhepo.” Minister ta thamuna ngaaka. Ta popi poshiindingili opo tuu mpoka, omunashipundi gwOkongo Community Forest, Martha Kapembe okwa gandja olupandu kehangano lyo-EIF molwomayambidhidho lya kala nokugandja koprojeka yawo Kapembe ta ti otaya ka longa ya tula ombunda moshihwa opo oprojeka ndjoka yi adhike po nokomapipi tage ya.
“Ohandi talelwa po kookasitoma odhindji ndhoka hadhi ya momwaalu omunene, tadhi tu yambidhidha naashika ohashi tu pe omukumo tu longe nuudhiginini,” ta ti ngaaka.