WALVISBAY
Embombolokelo lyaakwashigwana kOmbaye olya etitha ompumbwe onene yomahala gokukala mondoolopa ndjoka yokomunkulofuta.
Aantu oyendji ohaye ya huka neineekelo okukonga iilonga unene moshikondo shoohi, shoka shi li omugandji omunene gwiilonga moshitopolwa shika. Ihe ngele oonkambadhala dhawo odha ponyo okumona iilonga, aakalimo ohashi ya ningile oshidhigu okumona omalukalwa ge li hwepo. Onkalo ndjika oya etitha eindjipalo lyoombashu unene momalukanda ngaashi Kuisebmond naTutaleni, sho aakalimo taya kambadhala okwiimonena omalukalwa moka ye na okukala. Molwuupyakadhi wondawu moshitopolwa shika shokomunkulofuta, oombashu odhindji odha dhengelwa niipilangi, omamboolota oshowo omaplastika. Elelo lyondoolopa otali tengeneke omuyalu gwoombashu dhi li mOmbaye gu li pokati 5 000 – 6 000.
Molwaashoka odhindji dhomoombashu dhika odha dhengelwa momalugumbo gomagumbo gomakuma, aakalimo olundji ohaya kutha omalusheno okuza momagumbo ngoka. Ekutho lyomalusheno ndika lyaa shi lyopaveta ohali etitha iiponga yomililo.
Nonando aakalimo ohaya londodhwa shi nasha nomaupyakadhi gokukutha omalusheno pamukalo nguka, olundji oye uvite kutya kaye na we ompito yimwe okwiimonena omalusheno. “Ngele ku na mpoka ho lala uusiku mondoolopa muka mwa talala, oshi li uupyakadhi uunene. Molwashoka ito vulu okuhiila ondunda yokulala, shi hwepo ashike u gongele iilongitho ya gwana nokudhengela okambashu kwoye mwene,” osho Paulina Shivute omukalimo gomoTutaleni ta ti.
Pethimbo ndika molukanda Tutaleni omu na aantu oyendji noonkondo, noombashu odha nika oshiponga nodha tungwa wo nayi. Oombashu ohadhi vulu okukwatwa nuupu komililo, omo wo hamu ningwa unene omiyonena, nohadhi vulu okutaandelitha nuupu omukithi goTB.
Uupyakadhi wa gwedhwa owu nasha nominino dhomeya gonyata, shoka hashi etitha ominono dhi thite nokutopa.
“Shika kashishi oshinima oshipe. Oombashu otadhi monika konyala mondoolopa kehe, nomoshilandopangelo wo. Omolwashike aantu ye dhi kuminwa? Haantu atuhe hatu kutha omalusheno momagumbo shaa li paveta ngoka haga etitha omulilo. Ngame onda kala mokambashu kandje ngashingeyi oomvula ne, na inandi mona natango oshiponga shomulilo.
Omulilo otagu vulu okufika ehala kehe, ihe kashishi ashike muumbashu,” osho omukalimo gomoTutaleni, Chris Damaseb ta ti a geya.
Pethimbo ndika edhengelo lyoombashu kali li paveta oshoka itali iyutha koompango nomalandulathano gaMuni ge nasha nomatungo oshowo uundjolowele.
Oonkambadhala dhaMuni okundungika aakalimo shi nasha nomaupyakadhi haga etithwa komikalo dhika otaga monika ga hulila momakutsi ga thita.
Osha monika wo kutya ooyene oyendji yomagumbo ohaya pitika uumbashu sigo uhamano wu dhengelwe momalugumbo gawo, shoka sha etitha onkalo yi dhigupale. Muni gwaMbaye okwa tota po oprojeka yokugandja omagumbo gombiliha nelalakano okushunitha pevi omuyalu gwoombashu, kakele osheetwapo shika osha eta ngaa esindano lyontumba. Ookampani dhoohi dhayooloka nadho odha kambadhala okutungila aaniilonga yadho omagumbo gombiliha. Elelo lyondoolopa oli li momalongekidho okutota po ondondo ontiyali yaTutaleni.
Shoka tashi yemateke, oshoka shoka kutya oonkambadhala dhoka oshowo dha faathana komahangano gokutunga omagumbo ngaashi NHE noproholama Tutungeni (Build Together) inayi pondola sha okukutha po ompumbwe yomagumbo gombiliha ngoka ga pumbiwa unene koshigwan.
Onkee eindjipalo lyoombashu otali tsikile pwaa na ekandulopo lyomukundu.