Minista wehongo Anna Nghipondoka ota ti okwa tila ngeenge ovahongifikola ova i mekangha shaashi eshi otashi piyaaneke elihongo lovanafikola.
Okwa ti ekangha lovahongifikola otali ka eta oupyakadi kovanafikola shaashi itava kala vali tava hongwa pefimbo olo ovahongifikola vavo ve li mekangha.
Okwa yelifa ta ti konima ngeenge ekangha ola pu ovahongifikola otava kala ve na oilongwa i li konima omanga vamwe tava kala va hala okuhonga tava endelele opo va mane ko oilongwa yavo diva.
Onghee okwa ti naashi otashi ka eta ounona vahapu va kale va dopa shaashi itava kala vali ve litula mo ngaashi kwa li shito.
Minista okwa ti ekangha otali uya pefimbo lii loshikako shaxuunina osho shi li sha fimana kovanafikola. Ovahongifikola moshilongo ashishe ove lipyakidila nokulishangifa opo va ye mekangha lopambili eshi tava pula epangelo li wedele eendjabi davo. Nghipondoka edi okwe di popya eshi a ninga eenghundafana naKundana ta hokolola kutya ekangha eli otali ka eta edopo li li pombada kovanafikola keendodo da yooloka.
“Unene tuu ovanafikola ve li meendodo edi hadi shange omakonakono tete otava ka kumwa kekangha eli shaashi ovahongifikola vavo itava kala vali va hala okuhonga,” Nghipondoka ta ti.
Minista okwa hokolola ta ti ope na oinima ihapu tai ka kumwa kekangha eli ngaashi omatambulifo ounona, okulongekida omakonakono a xuunina noshoyo eyandjo louyelele kombinga yomaifano a yooloko kovanafikola. “Ngeenge ovahongifikola ova i mekangha ohatu kala twa taalela eshongo linene lovanafikola tava kala ve li komaumbo vehe na eshi tava ningi omanga ovanafikola vamwe otava kala ve li keefikola vehe na ovahongifikola,” minista ta ti. Minista okwa weda po ta ti yee ita ti kutya ovahongifikola inava ya mekangha shaashi ke na sha oufemba wokukelela ovahongifikola vaha ye mekangha.
“Ovahongifikola ove na oufemba wavo vene wokuninga omatokolo,” minista ta ti.
Okwa kunghilila ovadali opo va kale tava yambidida ounona vavo moinyangadalwa yofikola pefimbo ovahongifikola tava ka ya mekangha.
Okwa weda po yoo vali ta ti okwa pandula ovahongifikola eshi va kala tava hongo nondjungu pefimbo lombuto yoCovid-19 shaashi kakwa li shipu kuvo. – fhmalwa@nepc.com.na